Pushteti i PDK-së në Ferizaj, komunës që drejtohet nga Agim Aliu, është denoncuar publikisht për një tender që ia dha një firme vetëm disa ditë pasi që e njëjta ishte krijuar. “Skemë e organizuar për vjedhje të buxhetit”, ka shkruar përfaqësuesi i një organizate. Një hulumtim i Insajderit ka zbuluar se edhe pse firma është e re, numri kontaktues është i njëjti me firmën e biznesmenit Agon Halili, i cili për dy vite ka marrë gjashtë tender në këtë komunë.
Me 14 shkurt të 2025’tës, komuna e Ferizajit kishte njoftuar për hapjen e tenderit “Platforma gjithëpërfshirëse për zhvillim ekonomik, inovacion dhe turizëm”. Vlera e parashikuar e tenderit kishte qenë 55 mijë euro.
Ndërkohë me 1 prill është nënshkruar kontrata, duke u shpërblyer me tender grupi i operatorëve ekonomik, “Kutia Press SH.P.K dhe Agon Halili B.I”.
Vlera e përgjithshme e tenderit është 2,048.30 euro.
Por, me dhënien e këtij tenderi, janë hedhur dyshime ndaj dy kompanive fituese. Sipas denoncimeve publike dyshohet për mashtrim e skemë të vjedhjes.
Insajderi ka hulumtuar edhe në ARBK, rreth dy kompanive. Biznesi Agon Halili është regjistruar në vitin 2020 në ARBK. Mirëpo bien në sy disa detaje dyshuese.
Kompania tjetër fituese, Kutia Press SH.P.K, është regjistruar në ARBK, ditën e njëjtë kur ishte hapur tenderi për “Platforma gjithëpërfshirëse për zhvillim ekonomik, inovacion dhe turizëm”.
Që bie në ndesh me kriterin për përvojë 3-vjeçare në fushën përkatëse.
“Operatori ekonomik duhet të ofrojë dëshmi se ka përfunduar me sukses shërbime të ngjashme, në 3 (tre) vitet e fundit (duke filluar nga data e publikimit të Njoftimit për kontratë), në vlerë minimale prej 60,000.00 €“, thuhet në dosjen e tenderit.
Cila është lidhja e dy kompanive fituese, Kutia Press dhe Agon Haliti?
Sipas Agjencisë së Regjistrimit të Bizneseve, dy kompanitë fituese të tenderit “Platforma gjithëpërfshirëse për zhvillim ekonomik, inovacion dhe turizëm”, kanë pronarë të ndryshëm.
Por, befasisht, numri kontaktues figuron i njëjti te të dy kompanitë.
Në ARBK, kompania individe Agon Haliti, e regjistruan në 2020 ka të vendosur numrin kontaktues. Që është numri i njëjtë në ARBK te biznesi i ri “Kutia Press” e hapur para dy muajve.
Gazeta Insajderi ka hulumtuar rreth “Agon Halitit” i cili brenda dy viteve ka fituar gjashtë tendera nga komuna e Ferizajit.
Siç shfaqet te E-Prokurimi një tender figuron ‘i përfunduar’, ndërsa pesë tendera tjerë janë në ‘realizim’.
Reagime lidhur me këtë çështje kanë ardhur edhe nga një organizatë joqeveritare dhe nga opozita në Ferizaj.
Përfaqësuesi i Organizatës Lëvizja për Demokraci, Megjid Ramusa, ka pretenduar se kjo ecuri e këtij tenderi nuk është vetëm mashtrim por është skemë e organizuar për vjedhje të buxhetit publik.
“Kështu vjedhet në Komunën e Ferizajt: Një kompani e regjistruar brenda 24 orëve e fiton tenderin për “hvillim ekonomik”! kompania është regjistruar në emër të një personi tjetër. Por gabimi fatal? Numrin personal të telefonit, Agoni e ka harruar në dokumentet zyrtare të ARBK-së.Kriteri bazë i tenderit është përvojë 3-vjeçare në fushën përkatëse ky kriter është shkelur haptazi. Kompania është themeluar më 14 shkurt dhe më 5 mars shpallet fituese. Nuk kalon as një muaj! Ky nuk është thjesht një mashtrim, është skemë e organizuar për vjedhje të buxhetit publik, ku të njëjtët emra, me kompani të ndryshme, i rrotullojnë tenderat, ndërsa qytetarët mbesin të pa informuar çka ndodhë”, ka shkruar Ramusa në Facebook.
Tutje, reagim ka pas edhe nga opozita në Ferizaj. Asamblistja e LDK’së, Verona Isaki, në këtë komunë ka theksuar lidhur me këtë rast “Qudia s’paska skej”.
Isaki ka ngritur dyshime mbi pronësinë e kompanisë Kutia Press SH.P.K.
“Qudia që s’te qudit me! Me datën 13.02 hapet tenderi me titullin “Platforma gjithëpërfshirëse për zhvillim ekonomik, inovacion dhe turizëm”, ndërsa me datën 14.02 në ARBK figuron të jetë regjistruar pikërisht kompania që e kishte fituar këtë tender! Qudia s’paska skej! Kutia Press SH.P.K del të jetë e regjistruar me të njëjtin numër telefoni si të Agon Halili B.I, ani pse ky biznes nuk i takon personit të njëjtë, pra “me letra”, në ARBK figuron se Kutia Press SH.P.K është nën pronësi të dikujt tjetër (dhe shpresoj që personi ta dijë se e drejton këtë kompani)”, ka shkruar ajo në Facebook.
‘I plotësojmë kriteret”, firma që mori tender pak ditë pas regjistrimit ka një shpjegim.
Nga kompania Kutia Press, për Insajderin kanë dhënë shpjegimet e veta. Siç thuhet në përgjigje, përzgjedhja e kompanisë së tyre fituese në këtë tender është plotësisht e përgjegjshme dhe në përputhje me Ligjin e Prokurimit Publik.
“Kutia Press SH.P.K. ka dorëzuar formularin për hapjen e biznesit më datë 10 shkurt 2025, dhe regjistrimi zyrtar është finalizuar më 14 shkurt 2025. Sipas Ligjit Nr. 04/L-042 për Prokurimin Publik në Republikën e Kosovës, nuk ka asnjë dispozitë që ndalon bizneset e reja të aplikojnë për tenderë publikë, për sa kohë që ato plotësojnë kriteret e përcaktuara në dosjen e tenderit“.
Ata thonë se kanë aplikuar si grup i operatorëve ekonomikë, me Agon Halili B.I., i cili ka ofruar referenca të ngjashme që plotësojnë kriteri se “operatori ekonomik duhet të ofrojë dëshmi se ka përfunduar me sukses shërbime të ngjashme, në 3 (tre) vitet e fundit”.
“Në lidhje me kërkesën që “Operatori ekonomik duhet të ofrojë dëshmi se ka përfunduar me sukses shërbime të ngjashme, në 3 (tre) vitet e fundit, në vlerë minimale prej 60,000.00 €”, kemi aplikuar si grup i operatorëve ekonomikë, ku Agon Halili B.I. ka ofruar referenca të ngjashme që plotësojnë këtë kriter. Ligji për Prokurimin Publik lejon që, në raste të aplikimeve si konsorcium, të merren parasysh kapacitetet dhe përvojat e secilit anëtar të grupit. Neni 66 i Ligjit Nr. 04/L-042 përcakton se një kërkesë për pjesëmarrje ose një tender mund të paraqitet nga një grup operatorësh ekonomikë, dhe se të gjithë anëtarët e tillë janë përgjegjës bashkërisht dhe individualisht ndaj autoritetit kontraktues për përmbushjen e kontratës”.
Një përgjigje e kanë pasur edhe për numrin e njëjtë që shfaqet te të dy kompanitë, ani pse pronari figuron tjetër.
“Sa i përket faktit që Kutia Press SH.P.K. dhe Agon Halili B.I. kanë të njëjtin numër kontaktues në ARBK, kjo mund të jetë rezultat i përdorimit të një zyre të përbashkët ose marrëveshjeve të tjera operative mes palëve. Megjithatë, kjo nuk ndikon në ligjshmërinë ose vlefshmërinë e aplikimit tonë si grup operatorësh ekonomikë”, kanë thënë nga Kutia Press për Insajderin.
Gazeta Insajderi, ka dërguar pyetje edhe te komuna e Ferizajt, për të marrë ndonjë shpjegim, mirëpo deri në publikimin e këtij teksti nuk kanë kthyer ndonjë përgjigje.
