Drejtori ekzekutiv i KDI-së, Ismet Kryeziu, thotë se konstituimi i institucioneve, Kuvendit dhe Qeverisë së Kosovës, nuk mund të reduktohet vetëm në sigurimin e numrave dhe ndarjen e posteve.
Kryeziu thotë se dallimet mes LVV dhe partive që ishin katër vite në opozitë janë të theksuar në çështje thelbësore për të ardhmen e vendit, si dialogu me Serbinë, zhvillimi ekonomik dhe orientimi euroatlantik.
Ai shton se pa një kompromis substancial mbi këto prioritete dhe orientime politike, çdo qeveri mbetet e brishtë dhe e paqëndrueshme, pavarësisht numrave.
Postimi i plotë:
Konstituimi i institucioneve, Kuvendit dhe Qeverisë së Kosovës, nuk mund të reduktohet vetëm në sigurimin e numrave dhe ndarjen e posteve.
Dallimet mes LVV dhe partive që ishin katër vite në opozitë janë të theksuara në çështje thelbësore për të ardhmen e vendit, si dialogu me Serbinë, zhvillimi ekonomik dhe orientimi euroatlantik. Këto nuk janë thjesht dallime sipërfaqësore, por përplasje vizionesh që e bëjnë çdo koalicion potencial shumë më kompleks dhe më të vështirë për t’u arritur.
Pra, përtej politikave ditore, fushatës së ashpër, përplasjeve dhe diskursit fyes, sfida reale është nëse VV-ja dhe të tjerët kanë vullnetin për të shkrirë këto dallime dhe për të ndërtuar një qeverisje të përbashkët mbi baza strategjike dhe politike të qarta.
Pa një kompromis substancial mbi këto prioritete dhe orientime politike, çdo qeveri mbetet e brishtë dhe e paqëndrueshme, pavarësisht numrave.
