Aktivistët e grupit “Uzinat” kanë siguruar disa pamje të cilat ia kanë dërguar redaksisë N1 në Beograd.
Në atë videoklip, siç thonë ata, shfaqen pjesëmarrësit e të ashtuquajturit “marshit nga Kosova dhe Metohija”, të cilët po shkonin për në mitingun e Alleksandar Vuçiqit në Beograd, duke u ngarkuar në autobusë jo shumë larg qendrës së qytetit Gornji Milanovac, ka raportuar N1.
Sipas dëshmisë së qytetarëve, të mërkurën rreth orës 15:30 një kolonë këmbësorësh është larguar nga parkingu te vendi i quajtur “Shtëpia Norvegjeze”. Gjatë shëtitjes kanë bërë pushim në fabrikën “Spektar”, ndërsa në fshatin Majdan kanë mbërritur rreth orës 18:30, përballë tavernës “Shofer”.
Vetëm dhjetë minuta më vonë, në orën 18:40, shfaqen dy autobusë dhe pak më pas vijnë edhe dy të tjerë, në të cilët hipin të gjithë “këmbësorët”. Sipas dëshmitarëve, asnjëri nga ta nuk ka mbetur, përveç disa personave që ndodheshin në dy makina.
Distanca mes “Shtëpisë Norvegjeze” në Gornji Milanovac dhe tavernës “Shofer” në fshatin Majdan është afërsisht 10 kilometra.
Kujtojmë se ky marsh është organizuar pas thirrjes së presidentit serb, Vuçiq, për një tubim në Beograd më 12 prill. Përmes tij, presidenti serb po synon të tregojë se ka mbështetje popullore, duke tentuar të minimizojë efektin e protestës masive kundër tij të mbajtur kohë më parë në Beograd, por edhe protestave të vazhdueshme që po mbahen në vende të ndryshme të Serbisë.
