Zyra e Rregullatorit të Energjisë në Kosovë (ZRRE) ka shpallur zyrtarisht vendimin për shtrenjtimin e tarifave të energjisë elektrike, duke e rritur çmimin me 16%. Ky vendim ka shkaktuar reagime të ashpra nga qytetarët, të cilët kanë protestuar në masë para zyrave të ZRRE-së në Prishtinë, vetëm një orë pas shpalljes së lajmit.
Në një komunikatë për media, ZRRE ka konfirmuar rritjen e çmimit të energjisë, por ka shmangur dhënien e detajeve të mëtejshme për shkaqet që çuan në këtë vendim.
Mungesa e transparencës ka acaruar qytetarët, të cilët janë shprehur të revoltuar përmes pankartave dhe thirrjeve si: “Kjo nuk është jetë, është mbijetesë”, “Nuk paguajmë për dështimet tuaja”, dhe “Fatura jonë, pasuria juaj”.
Pavarësisht protestave të shumta, ZRRE ka bllokuar mundësinë për komentim në postimet e saj në Facebook, duke e pamundësuar kështu shprehjen e pakënaqësisë publike në rrjetet sociale.
Në protestën e organizuar para ZRRE-së, e cila ishte e mbështetur edhe nga forca të shumta policore, qytetarët kërkuan që të ulet çmimi i energjisë elektrike dhe paralajmëruan edhe protesta të tjera.
Po ashtu, organizatorët e protestës kanë njoftuar se do të ngritin një padi në Gjykatën Themelore të Prishtinës për këtë vendim të rritur të çmimit.
Ndërkohë, Bordi i ZRRE-së ka deklaruar se në mbledhjen e fundit është vendosur për një rritje të çmimit të energjisë, por nuk ka dhënë detaje konkrete mbi përqindjen përfundimtare të kësaj rritjeje, duke lënë qytetarët dhe opinionin publik të spekulojnë.
