Anëtari i Nismës Socialdemokrate, Mevludin Krasniqi, ka reaguar lidhur me situatën e fundit politike në vend, e cila lidhet me moskonstituimin e Kuvendit të Kosovës. Ai ka theksuar se rasti nuk përbën precedent të paprecedentë, duke rikujtuar një situatë të ngjashme që ka ndodhur edhe më 2014.
“Nuk është hera e parë. E njëjta procedurë ka ndodhur edhe në vitin 2014!”, ka deklaruar Krasniqi.
Ai ka bërë të ditur se gjatë asaj kohe, kuvendi kishte kaluar nëpër një proces identik të konstituimit dhe zgjedhjes së organeve të tij, për të cilin ishte angazhuar edhe Gjykata Kushtetuese e Kosovës për shqyrtim.
Sipas tij, në aktgjykimin nr. KO119/14 të Gjykatës Kushtetuese, janë analizuar detajisht hapat proceduralë dhe nuk është konstatuar asnjë shkelje.
Nga pikat 34, 35 dhe 36 të këtij aktgjykimi, del se:
- Në rundin e parë të votimit, 44 deputetë votuan “për”, ndërsa pjesa tjetër nuk mori pjesë në votim.
- Pas një pauze, Kryesuesja rifilloi seancën dhe u zhvillua një votim i dytë, ku 117 deputetë votuan pro raportit të Komisionit ad hoc.
- Deputetët dhanë betimin dhe Kuvendi vazhdoi punimet pa ndonjë ndërhyrje nga institucione të tjera.
“Precedenti ekziston. Kryesuesi i seancës nuk ka nevojë t’i drejtohet as Presidentes, e as ndonjë institucioni tjetër për këtë çështje”, ka shtuar Krasniqi, duke theksuar se kuvendi duhet të vazhdojë aty ku ka mbetur.
Ai u ka bërë thirrje deputetëve dhe qytetarëve që të kenë qetësi institucionale dhe të mos keqinterpretojnë situatën.
