Deputetja e LDK-së, Hykmete Bajrami, ka thënë se me mënyrën si u mbyll seanca u shkel rregullorja e Kuvendit, pasi duhej proceduar me votim.
“Sapo u konstatua që u shkel rregullorja e Kuvendit, pasi ishim në proces të votimit dhe VV në këtë rast duhej të propozonte emrin, duhet të procedohej me emrin dhe me votim. Paralelja që po e tërheq VV dhe Konjufca për kryetarin e nënkryetarët e Kuvendit, nuk është e njëjtë pasi kryetari përfaqëson Kuvendin, ndërsa nënkryetarët janë përfaqësues të partive politike”, tha ajo.
Bajrami shtoi se VV ka problem me kandidaturën dhe s’mund të kërkojë votim nga deputetët sipas vullnetit të partisë së tyre.
“Kërkesa për kohë shtesë për marrëveshje politike ku insistojnë se s’do ta ndërrojnë emrin e kandidates dhe insistimi që është e drejtë e tyre dhe që partitë të votojnë sipas vullnetit të VV-së dhe jo të deputetëve, kjo veç marrëveshje nuk është. VV ka problem me kandidaturën. Sikur të kishin vullnet mund të uleshin dhe të pyetnin se cili emër do të ishte më i duhur. Bllokuesit e vërtetë janë VV”, ka thënë ajo.
