LVV-ja të hënën përmendi nevojën për një “marrëveshje politike” për zgjedhjen e kryetarit të Kuvendit dhe për 48 orë nuk bëri asnjë përpjekje që kjo të arrihej. Në një takim “konsultativ” para vazhdimit të seancës, por edhe në sallën kryesore më pas këmbëngulën në propozimin e Albulena Haxhiut. “Lëvizja Vetëvendosje propozon atë që gjithmonë ishte propozimi ynë, zonjën Albulena Haxhiu për kryetare të Kuvendit të Republikës së Kosovës”, tha në seancë nënkryetari i LVV-së, Glauk Konjufca. Kandidatja e “gjithmonshme” e LVV-së për herë të tretë dështoi të zgjidhet kryetare e Kuvendit. PDK-ja dhe AAK-ja janë shprehur të gatshme për ta shqyrtuar një kandidaturë tjetër nga LVV-ja, e cila nuk po vjen.
Kuvendi nuk u konstituua as në tentimin e pestë. Albulena Haxhiu dështoi sërish të zgjidhej kryetareparlamentare, duke mos marrë më shumë se 57 vota. 46 deputetë ishin kundër zgjedhjes së saj, ndërsa tre abstenuan.
Seanca konstituive nisi të vazhdonte sot, pasi ajo u ndërpre të hënën, kur LVV-ja nuk e hodhi për votim propozimin e njëjtë për kryeparlementare.
Nënkryetari i Lëvizjes Vetëvendosje, Glauk Konjufca atë ditë kërkoi “kohë shtesë që të mos përsëritet situata e njëjtë”. Siç ishte shprehur ai, “kjo situatë politike nuk mund të zgjidhet përveçse me një marrëveshje politike”.
“Meqenëse e kemi pa që të gjitha subjektet politike qysh dje janë prononcuar se do ta kishin qëndrimin e njëjtë edhe në këtë seancë, mendoj që kjo situatë politike nuk mund të zgjidhet përveçse me një marrëveshje politike”, tha ai të hënën.
Pavarësisht se e përmendi nevojën për “marrëveshje politike”, për 48 orë nuk pati asnjë lëvizje për arritjen e ndonjë konsensusi. Burimet e Gazetës Express thonë se asnjë përpjekje nuk është bërë në këtë drejtim.
Një takim konsultativ me partitë politike e thirri sot kryesuesi i seancës konstituive, deputeti i LVV-së Avni Dehari. Aty, përveç LDK-së që thotë se nuk votojnë asnjë kandidat të LVV-së për kryetar të Kuvendit, partitë e tjera morën pjesë.
Megjithatë, ky takim nuk do të ndryshonte asgjë.
“Ne vazhdojmë ta mbajmë qëndrimin e njëjtë”, iu tha Albulena Haxhiu gazetarëve duke hyrë në këtë takim.
Me të nisur vazhdimi i seancës konstituive, ish-kryeparlamentari doli sërish në foltore për ta propozuar po të njëjtin emër për kryetare të Kuvendit.
“Lëvizja Vetëvendosje propozon atë që gjithmonë ishte propozimi ynë, zonjën Albulena Haxhiu për kryetare të Kuvendit të Republikës së Kosovës. Të nderuar kolegë, ju lus të gjithëve që ta mbështesni dhe të dalim nga kjo bllokadë”, tha Konjufca.
Kryetari i PDK-së, Memli Krasniqi tha se meqenëse nuk i ka votat, LVV-ja “nuk mund ta imponojë emrin ashtu siç po kërkojnë”. Tha se “ky mentalitet që ne e kemi parë të shpërfaqur edhe në zgjedhje nuk kalon”.
“Sepse edhe në zgjedhje, të vetmit që ndoshta s’kanë pasë ofertë por kanë pasë kërkesë, ka qenë Lëvizja Vetëvendosje që kërkonte numër të votave. Edhe sot po vijnë po na i kërkojnë votat neve. Nuk merret vota me zor”, tha ai.
Krasniqi tha se do të ishin të gatshëm ta shqyrtonin “një kandidaturë tjetër” për kryetar të Kuvendit. “Jemi të gatshëm mos me pritë 48 orë, sepse s’është obligative me pritë 48 orë. Rregullorja thotë jo më vonë se 48 prë. Do të kishim mundur të takoheshim prapë nesër, do të kishim mundur të takoheshim prapë pasdite. Le të sjellin një kandidat apo kandidate që vërtet mund të jetë më e pranueshme”, tha ai, duke shprehur gatishmërinë për ta votuar dikë që “nuk ka prapra vetes një histori të përçarjes, po edhe të dështimeve, siç i ka kandidatja aktuale e cila dështoi për herën e tretë”.
Nënkryetarja e LDK-së, Hykmete Bajrami tha se për ta, “nuk ka asnjë kandidat të cilin do ta votonim”. Kjo, siç tha ajo, “për shkak të historisë së tyre, për shkak që janë shkelës të vazhdueshëm të Kushtetutës”.
“Ne e kemi deklaruar votën tonë. Ne nuk jemi të gatshëm të bëjmë marrëveshje politike. Nuk jemi të gatshëm për kompromise me Lëvizjen Vetëvendosje dhe rrjedhimisht nuk kemi arsye për çfarë të marrim pjesë në takim”, tha ajo.
Kryetari i AAK-së, Ramush Haradinaj tha se janë të interesuar që të kalohet ky ngërç, ndërsa tha se “nëse ju duhen votat tona, atëherë duhet të bashkëpunojnë”.
“Mendoj se do të ishte edhe në interes të tyre që ta propozojnë ndonjë kandidaturë unifikuese dhe të kalojë ky bllokim”, tha ai.
Haxhiu, siç tha Haradinaj “nuk është ndonjë figurë unifikuese”, dhe shtoi se “vetëm aty është dallimi”.
Ai më herët ka përmendur deputetet e LVV-së Saranda Bogujevci dhe Shqipe Mehmeti Selimi si dy emra që deputetët e AAK-së do t’i votonin për kryetare të Kuvendit.
