Avokati Arianit Koci i ka komentuar imazhet e fundit të kryeministrit në detyrë, Albin Kurti, i cili nga ndërtesa e Kuvendit te zyra e tij në qeveri shkon i rrethuar me disa truproja.
Ai ka vlerësuar se numri i madh e truprojave, të cilat janë të pajisura edhe me çadër anti-plumb, është jo normale.
Në profilin e tij në “Facebook”, Koci ka shkruar se ky është një alarm.
“Mbrohet me çadër lufte… dhe atë në qendër të Prishtinës! Nuk është normale. Një Kryeministër që ruhet me çadër anti-plumb. Me mburojë balistike. Me më shumë trupa sigurie se sa një president në gjendje lufte. Kjo foto nuk është vetëm një imazh – është një alarm. A është ai i rrezikuar? A ka ndonjë kërcënim real për jetën e tij që ne nuk e dimë? Apo jemi si shtet në një situatë të rëndë sigurie, që po fshihet nga publiku? Sepse kështu, askush para tij nuk është ruajtur. Unë personalisht brengosem për sigurinë e tij. Nuk i dëshiroj asgjë të keqe”, ka shkruar Koci, duke shtuar se institucionet duhet të tregojnë nëse kryeministri është i rrezikuar.
“Ai është Kryeministër i Kosovës dhe siguria e tij është interes i përbashkët – edhe njerëzor, edhe shtetëror. Por nëse Kosova ka hyrë në fazë ku lideri i saj ruhet me pajisje lufte – atëherë populli ka të drejtë të dijë: A jemi të sigurt? A është siguria publike në nivelin e duhur? Një shtet që fsheh rrezikun – e jo që e përballon atë bashkë me popullin – nuk është në rrugë të mirë”, ka shkruar Koci.
