Komisionerja për Zgjerim e BE-së, Marta Kos, në një intervistë për Radion Evropa e Lirë ka folur edhe për pritjet e Brukselit për formimin e qeverisë së re të Kosovës.
Kos ka thënë se është në kontakt me politikanët kosovarë dhe se të njëjtit janë shumë në favor të normalizimit të raporteve me Serbinë, gjë që është parakusht për dhënien e statusit të vendit kandidat, për të cilin Kosova synon.
“Ne po presim për [formimin e] qeverisë së re. Jam në kontakt me politikanët atje, dhe ata pretendojnë se janë shumë të favor të normalizimit të marrëdhënieve me Serbinë, çka është parakusht që të mund të nisë procesi i negociatave ose të jepet statusi i kandidatit”, ka thënë Kos, në një intervistë të dhënë për Radion Evropa e Lirë.
Ajo ka thënë se është shumë me rëndësi që qeveria e re e Kosovës të plotësojë disa parakushte të cilat “duhen të përmbushen”, por pa përmendur se cilat kushte janë ato.
Brukseli dhe Uashingtoni në vazhdimësi kanë përmendur themelimin e Asociacionit si një kusht që Kosova të ecë përpara në normalizimin e raporteve me Serbinë dhe në rrugën e integrimit evropian.
Sa i përket anëtarësimit në Këshillin e Evropës është bërë e qartë që Kosova duhet ta themelojë Asociacionin e Komunave me Shumicë Serbe. Mbetet të shihet nëse Asociacioni do të shndërrohet në kusht për marrjen e statusit të vendit kandidat për Kosovën.
Për marrjen e statusit të kandidatit fillimisht Komisioni Evropian duhet ta japë pëlqimin për aplikimin për anëtarësim e pastaj Këshilli Evropian duhet ta konfirmojë unanimisht statusin si vend kandidat.
“Nuk kam marrë asnjë sinjal nga shtetet anëtare ose nga presidenca daneze [e Këshillit Evropian] se kjo gjë [marrja e statusit gjatë presidencës daneze] mund të ndodhë. Por, mendoj se do të ishte shumë mirë të nisim”, tha ajo.
Presidentja e Kosovës, Vjosa Osmani, kohë më parë ka deklaruar se Kosova ka përmbushur kushtet për marrjen e statusit të vendit kandidat.
“Presidentja theksoi se Kosova ka mbushur të gjitha kushtet për ta fituar statusin e vendit kandidat të BE-së”, kishin deklaruar nga Presidenca e Kosovës më 3 shtator 204, pas një takimi mes Osmanit dhe shefit të Zyrës së BE-së, Aiv Orav./GazetaExpress/
