Deputeti i Lëvizjes Vetëvendosje, Ilir Kërçeli, folur në lidhje me mundësinë e mbajtjes së zgjedhjeve të reja nëse nuk arrin të konstituohet Kuvendi.
Ai tha se subjekti politik të cilin ai përfaqëson (LVV) çdoherë është e gatshme të shkojë në zgjedhje.
“Ne së pari duhet t’a konstituojmë Kuvendin për zgjedhje të reja… nuk mund të shkojmë në zgjedhje tani pa u konstitu Kuvendi, pra nuk mund ta dërgojmë vendin në zgjedhje pa e konstitu Kuvendin. Deputetët duhet të pajtohen t’a shpërbëjnë Kuvendin për të shkuar në zgjedhje, kjo është rruga se si shkohet në zgjedhje. Nëse opozita mendon që jemi në një ngërç dhe nëse janë të barrikaduar se nuk do të leshojnë pe në këtë drejtim atëherë më e arsyeshme është që të ulemi, të merremi vesh për datën e zgjedhjeve, muajin e zgjedhjeve, edhe t’a votojmë konstituimin e Kuvendit edhe t’a shpërbëjmë Parlamentin e të shkojmë në zgjedhje. Vetëvendosje është e gatshme të shkojë në zgjedhje, çdo ditë, mendoj se çdo subjekt politik duhet të jetë i gatshëm për zgjedhje në çdo moment” deklaroi Kërçeli në Blic Interview.
Ai foli edhe për rënien që ky subjekt politik pati në zgjedhjet e 9 shkurtit.
“Tek rënia në zgjedhjet e fundit mund të interpretohet në disa mënyra, mirëpo aty kemi parë se kemi edhe një manipulim të votës të Lidhjes Demokratike të Kosovës për të cilën ne mendojmë se aty ka ndodh një manipulim sepse kemi parë edhe vetë anëtarë të Kryesisë së Lidhjes Demokratike të Kosovës, eksponentë aty që janë kryesorë.Kemi parë tek LDK-ja që ka akuza edhe për grupe kriminale brenda subjektit politik në procesin e zgjedhjeve” tha Kërçeli në Blic Interview.
