Gjykata Supreme e ka shpallur pjesërisht të paligjshme një pjesë të rregullores së Prishtina Parking.
Siç bëhet e ditur, u rrëzuan gjobat dhe bllokada e veturave.
Njoftimi:
Gjykata Supreme shpall pjesërisht të paligjshme Rregulloren e Komunës së Prishtinës, për Organizimin dhe Shfrytëzimin e Parkingjeve
Prishtinë, 08 maj 2025 – Kolegji i Gjykatës Supreme, në çështje administrative, në seancën e shqyrtimit gjyqësor publik, në praninë e përfaqësuesit të paditëses, përfaqësuesit të paditurës dhe përfaqësuesve të palës së tretë, më datë 16.04.2025, ka aprovuar pjesërisht si të themeltë kërkesëpadinë e paditëses, Qendra për Raste Gjyqësore Strategjike -l platformë e Grupit për Studime Juridike dhe Politike, paraqitur kundër të paditurës Komuna e Prishtinës dhe palës e tretë N.P.L., “Prishtina Parking” SH.A., me seli në Prishtinë.
Kolegji i Gjykatës Supreme ka shpallur pjesërisht të paligjshëm dhe ka shfuqizuar pjesërisht nenin 1 të Rregullores për Organizimin dhe Shfrytëzimin e Parkingjeve të Komunës së Prishtinës, vetëm në pjesën që ka të bëjë më mënyrën e pagesës, si dhe nenin 14 dhe 15 të kësaj rregullore; ka shpallur pjesërisht të paligjshëm dhe ka shfuqizuar pjesërisht nenin 8 të kësaj Rregulloreje, vetëm në pjesën që ka të bëjë me parking të vizitorëve, në hapësirat rezidenciale, i cili parkim nga vizitorët nuk mund të jetë më herët se ora 16:00 dhe më vonë se ora 18:00; ka shpallur pjesërisht të paligjshëm dhe ka shfuqizuar nenin 12 paragrafët 1 dhe 9 të kësaj Rregulloreje; ka shpallur pjesërisht të paligjshëm dhe ka shfuqizuar nenin 22 paragrafët 1, 8 dhe 9të kësaj Rregulloreje; ka refuzuar si të pabazuar pjesën tjetër të kërkesëpadisë së paditëses Qendra për Raste Gjyqësore Strategjike – platformë e Grupit për Studime Juridike dhe Politike, për tej asaj që është gjykuara në pikat -I-, -II-, III-, -IV- dhe -V-, të dispozitivit të këtij aktgjykimi, më të cilën ka kërkuar që të shfuqizohet në tërësi, Rregullorja për Organizimin dhe Shfrytëzimin e Parkingjeve të Komunës së Prishtinës.
Aktgjykimin e gjeni të publikuar në linkun:
https://supreme.gjyqesori-rks.org/wp-content/uploads/verdicts/SUP_AA%20_02_2025_SQ.pdf
Ky aktgjykim do të publikohet edhe në Gazetën Zyrtare të Republikës së Kosovës.
