Vushtrri, 12 maj 2025 – Kryetari i Komunës së Vushtrrisë, Ferit Idrizi, dhe zëvendësministri i Mjedisit, Planifikimit Hapësinor dhe Infrastrukturës, Hysen Durmishi, kanë firmosur sot një marrëveshje bashkëfinancimi për realizimin e tri projekteve të rëndësishme infrastrukturore në komunë, me vlerë të përgjithshme prej 3.7 milionë euro.
Projekti më i rëndësishëm që përfshihet në këtë marrëveshje është asfaltimi i rrugës Vushtrri – Skoçan, duke zgjidhur një problem të kahmotshëm për banorët e këtij fshati që deri më sot kishte mbetur pa rrugë të asfaltuar. Sipas kryetarit Idrizi, ky investim nuk ka vetëm rëndësi infrastrukturore, por edhe zhvillimore, pasi Skoçani është i pozicionuar në një zonë të bukur malore me potencial për turizëm dhe agroturizëm.
“Fshati Skoçan, një vend me bukuri të rralla natyrore, do të përfshihet në një projekt të madh turistik dhe do të jetë më i qasshëm për vizitorë dhe investitorë,” ka deklaruar Idrizi.
Dy projektet e tjera që do të realizohen në kuadër të kësaj marrëveshjeje janë: rikonstruktimi i rrugës Druar – Pestovë, duke përfshirë edhe përfundimin e segmentit që lidhet me autostradën, si dhe rikonstruktimi i rrugës “Hamdi Gashi” në qytetin e Vushtrrisë.
Idrizi falënderoi zëvendësministrin Durmishi për mbështetjen dhe theksoi se ky bashkëpunim është shembull i angazhimit të përbashkët për përmirësimin e kushteve të jetesës për qytetarët.
“Vazhdojmë të punojmë me përkushtim për projekte që kanë ndikim të drejtpërdrejtë në cilësinë e jetës së qytetarëve tanë,” u shpreh kryetari.
Këto investime pritet të ndikojnë dukshëm në zhvillimin ekonomik lokal dhe lehtësimin e qarkullimit në zonat rurale dhe urbane të Vushtrrisë.
