Një 68-vjeçar nga Kosova pretendon se u mashtrua nga kompania e drejtuar nga ish-ministri Arban Abrashi në Suedi. Pa paga e vetëm mashtrime. “Na la të flinim në kamion”, thotë shoferi i cili rrëfeu historinë e tij ekskluzivisht për Insajderin.
Ish-ministri i Punës dhe Mirëqenies Sociale, Arban Abrashi, i cili shërbeu për disa vite në këtë detyrë e më pas mori postin e Ministrit të Infrastrukturës deri ne vitin 2021, tani po përballet me akuza serioze.
Përkundër se në të kaluarën kishte në fokus mirëqenien e qytetarëve, sot ish ministri i Lidhjes Demokratike te Kosovës po akuzohet për veprime që bien ndesh me këtë mision. Abrashi dyshohet për mashtrim dhe mosrespektim të obligimeve financiare ndaj disa punëtorëve kosovarë që i kishte punësuar në Suedi.
Sipas raportimit të gazetës Insajderi, dy punëtorë kanë rrëfyer ekskluzivisht për mënyrën se si ishin mashtruar nga Abrashi, duke pretenduar se ai nuk kishte përmbushur pagesat e premtuara sipas kontratës për punën e tyre si shoferë kamioni në kompaninë “AELS AB”, pronar i së cilës është Abrashi.
Insajderi sjell rrëfimin e një shoferi tjetër, 68 vjeçar nga Vushtrria, i cili tregon se si ishte ftuar nga Kosova për të punuar në Suedi, por pas mbërritjes atje, u përball me një realitet krejtësisht ndryshe nga ai që i ishte premtuar.
Ndiqeni rrëfimin e 68 vjeçarit:
Pas publikimit të shtrojës me rrëfimet e shoferëve, ish-ministri Arban Abrashi reagoi duke kontaktuar redaksinë e gazetës Insajderi, ku akuzoi median për shpifje. Megjithatë, ai nuk ofroi asnjë përgjigje konkrete lidhur me akuzat serioze që rëndojnë mbi të.
Gazeta kishte tentuar ta kontaktonte disa ditë para publikimit të intervistës, në përpjekje për të marrë qëndrimin e tij zyrtar. Por pavarësisht përpjekjeve, Abrashi nuk ishte përgjigjur.
