Ambasada e Shteteve të Bashkuara në Prishtinë i ka lavdëruar institucionet e Kosovës për ekstradimin e shtetasit kosovar Liridon Masurica në ShBA, i cili nga drejtësia amerikane akuzohet për mashtrim kibernetik.
Përmes një reagimi, ambasada amerikane ka vlerësuar se është mirënjohëse ndaj autoriteteve kosovare për mbështetje të vazhdueshme.
Sipas ambasadës, ky veprim përmirëson sigurinë publike.
“Bashkëpunim dhe koordinim i shkëlqyer midis Shteteve të Bashkuara dhe Kosovës, sipas Traktatit tonë të Ekstradimit. Një i pandehur është ekstraduar me sukses në Shtetet e Bashkuara për t’u përballur me drejtësinë me akuzat për viktimizimin e qytetarëve amerikanë. Jemi mirënjohës ndaj autoriteteve të Kosovës për mbështetjen e tyre të vazhdueshme. Kjo përpjekje e përbashkët përmirëson sigurinë publike dhe i bën të dy kombet tona më të sigurta”, është thënë në njoftimin e ambasadës së ShBA.
Liridon Masurica është ekstraduar në ShBA më 9 maj nga autoritetet kosovare.
Ai akuzohet për komplot për të kryer mashtrime me pajisjet e aksesit.
