Pasi kompania rajonale për furnizimin me ujë „Mitrovica“ sot ka marrë kontrollin mbi objektin e ujësjellësit në Zubin Potok, menjëherë ishte reagimi i ministrit të jashtëm serb, Marko Gjuriq i cili ka pretenduar se “përgjigja e Albin Kurtit ndaj thirrjes së presidentit të Këshillit Evropian, Antonio Costa, për deeskalim, është në fakt vazhdimi i eskalimit”, transmeton Paparaci.
Gjuriqi, në rrjetin social „X“, ka pretenduar se vetëm një ditë pas mesazhit të presidentit të Këshillit Evropian, Antonio Costa, i cili kishte shprehur pritshmërinë që “Kosova të angazhohet në normalizimin e marrëdhënieve me Serbinë” përmes një dialogu konstruktiv dhe shpresën që “veprimet njëanshme të regjimit të Kurtit në veri të Kosovës të mos jenë një trend”, jemi dëshmitarë të një tjetër “sulmi shqetësues ndaj stabilitetit të rajonit”.
„Përfaqësuesit e institucioneve të përkohshme të Prishtinës kanë hyrë sot në objektin e Ujësjellësit Rajonal në komunën me shumicë serbe të Zubin Potokut, duke rrezikuar funksionimin e një sistemi jetik komunal, nga i cili varet jeta e serbëve në veri të Kosovës. Përgjigja e Kurtit ndaj thirrjes së Costas për deeskalim është, pra, një vazhdim i eskalimit, dhe është krejtësisht e qartë se bëhet fjalë për një sfidë të vetëdijshme dhe të guximshme ndaj Bashkimit Evropian dhe përpjekjeve të tij për të stabilizuar kushtet në Ballkanin Perëndimor“, ka pretenduar Gjuriqi në propagandën e tij të radhës./Paparaci.com
