Bashkimi Evropian është shprehur i shqetësuar lidhur me aksionet e fundit që janë bërë në veri të vendit, duke i bërë thirrje edhe kryeministrit në largim Albin Kurti, dhe autoriteteve të Kosovës që të ndalojnë këto veprime dhe të tregojnë përmbajtje.
Nga BE, janë shprehur veçanërisht të shqetësuar me operacionet kundër kompanisë Vodovod Ibar në Mitrovicën e Veriut dhe kompanisë së shërbimeve publike në Zubin Potok, të cilat ofrojnë shërbime bazike për komunitetet që jetojnë në pjesën veriore të Kosovës, duke theksuar se veprimet e njëanshme dhe ato të pakoordinuara dëmtojnë përpjekjet për ndërtim të besimit ndërmjet komuniteteve.
“Operacionet, inspektimet dhe mbylljet e fundit të policisë së Kosovës të shërbimeve publike në Kosovë rrezikojnë të përkeqësojnë tensionin dhe të ndikojnë negativisht në jetën e përditshme të komuniteteve lokale, si dhe dëmtojnë pozicionin ndërkombëtar të Kosovës.
Ne jemi veçanërisht të shqetësuar për operacionet kundër kompanisë Vodovod Ibar në Mitrovica Veriore dhe termocentralit të furnizimit me ujë dhe kompanisë së shërbimeve publike në Zubin Potok, të cilat ofrojnë shërbime publike bazë për komunitetet që jetojnë në pjesën veriore të Kosovës.
Veprimet unilaterale dhe të pakoordinuara dëmtojnë përpjekjet për ndërtimin e besimit midis komuniteteve.”, thuhet në njoftim.
Në reagim theksohet edhe se si Kosovës ashtu edhe Serbia duhet të angazhohen në dialog dhe zbatojnë marrëveshjet e arritura përfshirë këtu edhe themelimin e Asociacionit të komunave me shumicë serbe.
“Ne i bëjmë thirrje Kryeministrit në largim Kurti dhe autoriteteve në Kosovë që të ndalojnë këto mbyllje, të ushtrojnë përmbajtje dhe të shmangin masat përshkallëzuese.
Si Kosova ashtu edhe Serbia nxiten të angazhohen në mënyrë konstruktive në dialogun e lehtësuar nga BE-ja për zbatimin e Marrëveshjes në rrugën drejt normalizimit dhe Aneksit të Zbatimit, si dhe marrëveshjeve të tjera të arritura në dialogun e lehtësuar nga BE-ja pa vonesa ose parakushte të mëtejshme. Kjo përfshin krijimin e Asociacionit/Bashkësisë së Komunave me Shumicë Serbe. Normalizimi i marrëdhënieve është një kusht thelbësor në rrugën evropiane për të dyja Palët.”, thuhet tutje në njoftim.
