Deputetja e LDK-së, Hykmete Bajrami ka vazhduar të jetë e ashpër ndaj vendimit për shtrenjtimin e rrymës për bizneset.
Ajo ka komentuar vendimin për liberalizimin e tregut të energjisë, proces, i cili, sipas saj, do të rrisë faturat deri në 260 për qind për rreth 1 mijë e 300 biznese.
“Dje, disa prej deputetëve të VV-së në Qeveri kishin mbledhur odat dhe shoqatat e biznesit kinse për të dëgjuar brengat e tyre lidhur me liberalizimin e tregut të energjisë, proces ky që po u rrit faturat deri në 260% për rreth 1300 biznese. A e dini cila është kërkesa e bizneseve? Kërkesa është që vendimi për liberalizim të tregut të energjisë të shtyhet për një vit – kaq”, ka thënë Bajrami në një postim në Facebook.
Mirëpo sipas saj, në vend që një kërkesë e tillë të merrej parasysh, ata që ende e quajnë veten ministra paskan thënë se këto biznese do t’i ndihmojnë duke ua subvencionu izolimin e ndërtesave. Merreni me mend: një metal përpunuesi te i cili rryma është 30% e kostos së prodhimit, këta i thonë ta izolojmë ndërtesën dhe të ndihmojnë me vokë ujin. Kaq dinë këta ose kaq mund të thonë, pasi veç prioritet prodhimin vendor nuk e kanë.
“A e dini se si justifikohen për tregtarët, Qeveria thonë “nuk iu subvencion energjinë korporatave që fitojnë qindra miliona euro”. Si injorantë që janë, këta nuk marrin parasysh faktin se ata prapë do të fitojnë qindra miliona euro, por kostot shtesë do t’i paguajnë qytetarët e vendit, ata me të ardhurat më të vogla, sepse çmimet do të rriten – e do të rriten çmimet e produkteve që shiten më së shumti – do të rriten çmimet e produkteve të konsumit të përditshëm, por as për qytetarët këta nuk mërziten”, ka thënë Bajrami.
Deputetja e LDK-së ka akuzuar se krejt të dhënat tregojnë se vendimet energjetike janë në favor të mafies energjetike.
“Me hy dhe me i analizu të dhënat e tregtimit të energjisë, çdo kush e kupton se këto politika janë krejt në favor të “mafies energjetike”, për të cilën deputeti Albin Kurti ka folur para se të bëhej kryeministër. Qysh atëherë, deputeti Kurti, si inteligjent që është, e ka ditur në tërësi rrjetin e tyre dhe mënyrën e funksionimit”, ka thënë Bajrami.
“Nga “duaje tënden” në “shkatërro tënden dhe blej nga importi”, metamorfozë si kjo e LVV-së nuk e njeh historia e re politike e Kosovës. Erdhën në pushtet duke rrokullisur kamionë me mallra nga Serbia, hoqën dorë nga pushteti sepse nuk pranonin të hiqej taksa 100% për produktet serbe, e vendosur në kohën kur ishte kryeministër Ramush Haradinaj. Pas më shumë se katër viteve në pushtet, sot janë kundër çdo biznesi vendor dhe në përkrahje të mafies energjetike”, ka shtuar ajo.
“Kosova ka deficit tregtar rreth 38 miliardë euro për vitet 2001 – 2021 dhe i ka 19 miliardë deficit vetëm gjatë qeverisjes së Kurtit. Deputeti Kurti ka shpërndarë qindra miliona të buxhetit për të blerë paqe sociale e vota, por asnjë veprim nuk ka ndërmarrë për ta ndihmuar ekonominë e këtij vendi, e cila do të ndihmonte mirëqenien e secilit qytetar”, ka thënë Bajrami.
Ajo ka njoftuar se LDK-ja të mërkurën ka thirr në takim shoqatat e bizneseve, ZRRE-në, Autoritetin e Konkurrencës dhe KESCO-n për të argumentuar kundërshtimin për shtrenjtimin e rrymës.
“Nesër në ora 14:00, ne i kemi ftuar shoqatat e biznesit, ZRRE-në, Autoritetin e Konkurrencës dhe KESCO-n për të argumentuar se tash për tash nuk mund të bëhet liberalizimi i tregut të energjisë pa konkurrencë në treg, për keqinterpretimin e nenit 37 të Ligjit për Energji Elektrike dhe për t’u zotuar si deputetë se për aq sa është në kompetencën tonë, ne do të merremi seriozisht me këtë çështje. Nëse ka ndonjë shoqatë që s’ka marrë ftesë dhe anëtarët e tyre ndikohen nga ky proces! Jeni të mirëseardhur”, ka shkruar ajo.
