Kryeministri në detyrë, Albin Kurti, në një intervistë për Radio Televizionin e Kosovës, ka thënë se kanë pritur që konstituimin e kuvendit ta bëjnë më shpejt.
“Ne kemi besuar se do ta kemi konstituimin e Kuvendit shumë më shpejt. Kemi propozuar Albulena Haxhiun si gruaja më e votuar në zgjedhje. Kemi besuar se do të ishte personi i duhur për këtë pozitë. 57 vota ishin për, dhe këtu nuk janë vetëm VV, Guxo dhe Alternativa por edhe minoritetet. Provuam disa herë, fillimisht nuk u votua komisioni për verifikim të mandateve por më pas u kuptua që ishte gabim dhe u vota. Duke mos i pasur 61 vota iu drejtuam presidentes me një letër nga kryesuesi Dehari. Nga votimi i hapur kaluam në votim të fshehtë”, tha Kurti.
Kurti e quajti të paprecedentë që nuk po votohet komisioni për votim të fshehtë për kryetar të Kuvendit.
“Ajo që po ndodhë është e paprecendentë. Tani nuk është kundërshtimi ndaj Albulena Haxhiut por ndaj mënyrës së votimit të fshehtë, që është shkelje e aktvendimit të Gjykatës Kushtetuese. I ftova në takim PDK-në e LDK-në dhe takimi nga trilateral përfundoi në bilateral. Mendova që të zgjedhnim kryetarin dhe nënkryetarët e Kuvendit dhe më pas të vazhdonim për formimin e qeverisë”, shtoi ai.
Sa i përket seancës së nesërme, tha se nuk është në pyetje Albulena Haxhiu por mënyra e votimit.
“Nesër nuk është në pyetje Albulena që është propozimi ynë por votimi i fshehtë. Nëse ata janë të sigurt për deputetët e tyre, le ta votojnë komisionin për votim të fshehtë dhe më pas të vazhdojmë për qeverinë”, deklaroi ai.
