Ka dështuar të hënën për të 18-tën herë konstituimi i Kuvendit të Kosovës dhe nesër pritet të jetë përpjekja e 19-të.
Kjo seancë do të mbahet 48 orë pas seancës së kaluar, pavarësisht se Lëvizja vetëvendosje kërkoi që seancat të mbahen vetëm një herë në javë, pasi s’po ka rezultat, gjë që u refuzua nga partitë tjera, PDK, LDK e AAK.
E, kjo thotë se përbën shkelje të rregullores së Kuvendit dhe të vendit të Gjykatës Kushtetuese, analisti Arton Demhasaj.
Ai për Gazeta Blic thekson se VV-ja si parti e parë e dalë në zgjedhje duhet sa më shpejt të gjejë zgjidhje dhe ta konstituojë Kuvendin.
“Sa i përket kërkesës së VV-së që seanca të mbahet vetëm një herë në javë është shkelje kushtetuese, shkelje e rregullores së Kuvendit, pasi edhe vendimi i Gjykatës Kushtetuese e ka përcaktuar që seancat nuk duhet të mbahen më larg se 48 njëra nga tjetra, kështu që në asnjë rrethanë nuk duhet të kërkojë partia që ka dalë e para në zgjedhje, që ta ndryshojë orarin e mbajtjes së seancave, në kundërshtim me vendimin e Gjykatës Kushtetuese. Përkundrazi, mendoj se VV si parti e parë e dalë nga zgjedhjet e 9 shkurtit jo që duhet të kërkojë zgjatje të afatit të mbajtjes së seancave, por duhet që ta shkurtojë atë dhe ta gjejë një zgjidhje sa më shpejt që Kuvendi të konstituohet dhe të ecet në drejtim të formimit të qeverisë”, shprehet ai.
Ai ka folur dhe për mos urgjencën e kryeministrit në detyrë, Albin Kurti, që të formohen institucionet, deklaratë të cilën ai e kishte thënë në takimin e krerëve të partive me Presidenten Vjosa Osmanit.
Sipas Demhasajt, Kosova po humb miliona nga BE për shkak të mos konstituimit të Kuvendit.
“Sa i përket pjesës se nuk ka urgjencë për formim të institucioneve, mendoj se është e tmerrshme, pra partia fituese, kryeministri në detyrë të dalë me këtë qëndrim, për aq kohë sa po flasim që Kosova po rrezikon çdo ditë t’i humbë miliona euro që janë të dedikuara nga BE për vendet e Ballkanit Perëndimor, që në këtë rast Kosova ka mungesë të konstituimit të Kuvendit dhe në mungesë të votimit të marrëveshjeve po rrezikon që t’i humbë këto para, por përpos kësaj, duke marrë parasysh se çka po ndodh në gjeopolitikën botërore, ku vendet po rirreshtohen në sferën botërore, Kosova nuk duhet ta humbë asnjë minutë por duhet t’i krijojë institucionet dhe sa më shpejt të arrijë kanale komunikimi, sidomos me SHBA-të por edhe vende të tjera të BE-së, që Kosova të bëhet pjesë e agjendës e njëkohësisht të bëhet bashkë me vendet perëndimore kundër të keqes. Kosova është në urgjencë më shumë se krejt vendet e Ballkanit, që të veprojë të ecë tutje, sidomos për rregullim të raporteve me SHBA-të”, vlerëson ai.
Po ashtu, ai shton se Albulena Haxhiu po përdoret për ta bllokuar konstituimin e Kuvendit dhe e gjitha është lojë e VV-së, pasi nuk i ka votat për formim të qeverisë.
“Është blerje kohe për shkak të mungesës së votave për ta bërë qeverinë, pra në mungesë të shumicës parlamentare për ta bërë qeverinë, ata po e bllokojnë Kosovën në stadin e konstituimit të Kuvendit, sepse po t’i kishin votat, ata e kishin ndërruar emrin e kandidatit, sepse nuk është emri i Albulena Haxhiut për kryetare të Kuvendit, emri i saj është vetëm për ta bllokuar kontituimin e Kuvendit dhe prandaj po e luajnë këtë lojë, njëherë me mosvotimin e saj, pastaj me ndërrimin e mënyrës së votimit që është antikushtetuese dhe tash me këtë kërkesën e fundit që t’i shtyjnë seancat për vetëm 1 herë në javë dhe të gjtiha këto janë për të blerë kohë për shkak se nuk e kanë shumicën parlamentare. Po të konstituohej kuvendi atëherë afati për formim të qeverisë është shumë i shkurtër dhe normalisht se nuk i kanë numrat, dhe frikësohen se po e humbin pushtetin dhe partitë opozitare po arrijnë ta formojnë një shumicë parlamentare dhe e krijojnë qeverinë. I gjithë problemi është këtu, mungesa e numrave”, deklaron Arton Demhasaj për Gazeta Blic.
Ndërsa, analisti politik, Arbnor Sadiku, thotë për Gazeta Blic se VV-ja s’ka urgjencë për formim të institucioneve pasi e ka pushtetin në dorë.
“Duket se VV s’ka asgjë me urgjencë dhe është e interesuar të vazhdojë kësisoj, pasi i ka levat e pushtetit në dorë dhe nuk i ngutet asgjë. Ndërsa opozita është e fokusuar tashmë në zgjedhjet lokale dhe ka filluar përgatitjen e kandidaturave për kryetarë komunash dhe siç po shihet jemi në një skenar ku praktikisht LVV do ta zvarrisë situatën për aq sa është e mundur dhe kësisoj kur të vijmë te zgjedhjet lokale mund të kemi edhe shpalljen e zgjedhjeve të jashtëzakonshme”, tha Sadiku.
