Deputetja e LDK-së, Doarsa Kica-Xhelili ka komentuar deklaratën e kryeministrit në detyrë, Albin Kurti se duhet të sfidohet nga deputetët nëse i ka numrat për ta bërë qeverinë.
Mirëpo deputetja e LDK-së i ka bërë thirrje Kurtit që të sfidojë partitë e tjera duke vënë një tjetër emër për kryetar të Kuvendit.
“Marrëveshja politike është çështja kryesore. E dyta është se nuk jemi të obliguar ta votojmë një person”, ka thënë deputetja e LDK-së.
“Nuk kam nevojë të komentojë vlerësimet e Kurtit, ne kemi ushtruar kallëzim penal ndaj tij sepse po shfrytëzojë mjetet e qeverisë. Por para se të lëshohemi me terma individualë, ne po flasim për institucione, ai duhet ta lirojë postin dhe t’ia jap dikujt tjetër”, ka thënë ajo.
Kica ka përmendur edhe deklaratat e partive të tjera se do ta votonin ndonjë emër tjetër që mund ta propozojë VV-ja për kryetar të Kuvendit.
“Ka parti politike që kanë deklaruar se do të votojnë kandidatë të tjerë të VV-së, ky është kompromisi politik. Testoj t’i ata, sepse ata kanë përmendur edhe emra. Asnjëherë nuk ka qenë çështje gjinore dhe është përbuzëse ta trajtosh një individ si gjini”, ka thënë Kica-Xhelili.
Ajo është pyetur edhe për propozimin e VV-së që të ketë votim të fshehtë në Kuvend.
“Nuk përjashtohet mundësia që të ketë edhe më pak [nga votimi i fshehtë] për ne është e rëndësishme nëse je duke i përfillur ligjet dhe rregulloret e Kuvendit. Nëse gjithçka do të shndërrohej në arbitraritet, atëherë pse na duhen ligjet”, ka thënë ajo.
