Deputeti i Partisë Demokratike të Kosovës, Abelard Tahiri, ka thënë se në mars të vitit 2016, në një konferencë në Slloveni, të organizuar sipas tij, me mbështetje të kompanisë serbe GEN, kryeministri i dorëhequr, Albin Kurti, ka mbajtur ligjëratë për “Kosovën në udhëkryq”.
Sipas Tahirit, bashkë me të ishte edhe ambasadori i Kosovës në Kroaci, Martin Berishaj, për të cilin tha se sot është protagonist i aferës më të madhe korruptive të shitblerjes së energjisë elektrike.
“Kjo nuk ishte rastësi. Pikërisht kompania GEN, me bazë në Serbi, gjatë qeverisjes Kurti përfitoi miliona nga fondet e dedikuara për sektorin energjetik të Kosovës. E gjithë kjo u bë përmes një rrjeti të përbashkët politik e ekonomik që sot ka sjellë pasoja të rënda për vendin”, shkroi Tahiri.
Tutje, ai tha se dy dështimet më të mëdha energjetike, refuzimi i projektit amerikan për ndërtimin e gazsjellësit që do ta lidhte Kosovën me rrjetin perëndimor dhe anulimin e ndërtimit të termocentralit “Kosova e Re”, mbajnë firmën e Qeverisë Kurti.
“Pasojat? Sot i paguajnë qytetarët. Me çmime të papërballueshme të energjisë. Me një jetë gjithnjë e më të vështirë. Me varfëri që thellohet dhe përgjegjësi që mungon”, shkroi Tahiri.
