Komandanti i Forcës së Sigurisë së Kosovës, gjenerallejtënant Bashkim Jashari po qëndron në vizitë zyrtare në Republikën e Shqipërisë me ftesë të homologut të tij, gjenerallejtënant Arben Kingji, shef i Shtabit të Përgjithshëm të Forcave të Armatosura të Republikës së Shqipërisë (FARSH).
Fillimisht gjeneral Jashari u prit me nderime të larta ushtarake nga shefi i Mbrojtjes së FARSH-it.
Pastaj vazhdoi takimi në mes të dy palëve ku gjeneral Kingji i uroi mirëseardhje Gjeneral Jasharit dhe e njoftoj lidhur me të arriturat e Forcave të Armatosura të Republikës së Shqipërisë.
Ndërsa, gjeneral Jashari e përgëzoi gjeneral Kingjin për të zhvillimet e FARSH-it nën udhëheqjen e tij, duke vlerësuar dhe shprehur mirënjohje të lartë për rolin e FARSH-it në funksion të garantimit të një mjedisi rajonal të sigurt.
“Në fund, të dy gjeneralët diskutuan për aktivitetet e përbashkëta dhe mundësitë e tjera të thellimit të bashkëpunimit në mes të dy forcave të armatosura, në interes të ruajtjes së paqes dhe sigurisë dhe rritjes së ndërveprueshmërisë”, thuhet në njoftim të FSK-së.
Në kuadër të vizitës zyrtare gjeneral Jashari takoi edhe ministrin e Mbrojtjes së Republikës së Shqipërisë, Pirro Vengu. Gjatë takimit të realizuar në Ministrinë e Mbrojtjes, Vengu e njoftoi gjeneral Jasharin për sukseset dhe sfidat e MM-së dhe FARSH-it, dhe rolin e saj në kuadër të aleancës së NATO-së.
Ndërsa në anën tjetër, gjeneral Jashari e përgëzoi ministrin Vengu për të arriturat e MM-së dhe FARSH-it dhe vlerësoi lartë mbështetjen e ofruar në zhvillimin e trajnimeve dhe aktiviteteve të përbashkëta.
“Gjithashtu KOMFSK me delegacionin e tij kanë realizuar vizitë zyrtare në Bazën Ajrore në Kuçovë të FARSH, ku është njoftuar me investimet dhe modernizimin e kësaj baze ajrore.
Kjo vizitë është dëshmi e përkushtimit bilateral për bashkëpunim konkret në rritjen e kapaciteteve të përbashkëta” thuhet në njoftim.
