Komuna e Ferizajt ka nënshkruar kontratë për “orientim në karrierë për gratë”, ku përfshihet edhe një kurs i gjuhës angleze që zgjat vetëm një muaj – gjë që ka ngjallur reagime e dyshime rreth projektit. Nga opozita e kanë cilësuar tenderin si ‘përpjekje për përfitime të dyshimta në emër të grave’, duke ironizuar idenë se dikush mund të mësojë anglisht për 30 ditë. Fitues të tenderit janë dy kompani, njëra e regjistruar vetëm dy muaj më parë, në kundërshtim me kriterin për përvojë 3-vjeçare, e që ndajnë të njëjtin numër kontakti, duke shtuar dyshimet për lidhje të fshehta. Insajderi ju sjell detaje
Komuna e Ferizajt me 1 prill ka nënshkruar kontratë për “Orientim në karriere për gratë në biznes dhe teknologji”.
Vlera e parashikuar e kësaj kontrate është 45 mijë euro.
Fituese të këtij tenderi janë shpallur grupi i operatorëve ekonomik “Kutia Press SH.P.K, Agon Halili B.I.”.
Vlera e përgjithshme e kontratës është 914 euro.
Ndërkohë, Drejtoria e zhvillimit ekonomik dhe turizmit në Ferizaj, me 24 prill ka bërë thirrjen publike për “trajnime falas për gratë dhe vajzat në fushat e rrobaqepësisë, dizajnit, menaxhimit të rrjeteve sociale dhe gjuhës angleze”.
Ceket po ashtu edhe trajnimi për gjuhë angleze, e që ky detaj ka shtuar dyshime nga opozita.
Thuhet: Gjuhë Angleze. Kurse për zhvillimin e aftësive të komunikimit. Kursi do të zgjatë 1 muaj.
Asamblistja e LDK’së në Ferizaj, Verona Isaki, ka ngritur dyshime rreth këtij tenderi. Ajo ka shkruar “tenderi “hajde “shnukim” naj pare në emër të grave”.
Tutje, ajo e ka vë në dyshim, mësimin e anglishtes për vetëm një muaj.
“Qysh more doni me ua mësu anglishten për 1muaj?”, shkruan Isaki.
Kush janë dy kompanitë fituese?
Insajderi ka hulumtuar edhe në ARBK, rreth dy kompanive. Biznesi Agon Halili është regjistruar në vitin 2020 në ARBK.
Kompania tjetër fituese, Kutia Press SH.P.K, është regjistruar në ARBK, më 14 shkurt 2025.
Që bie në ndesh me kriterin për përvojë 3-vjeçare në fushën përkatëse.
“Operatori ekonomik duhet të ofrojë dëshmi se ka përfunduar me sukses shërbime të ngjashme, në 3 (tre) vitet e fundit (duke filluar nga data e publikimit të Njoftimit për kontratë), në vlerë minimale prej 60,000.00 €“, thuhet në dosjen e tenderit.
Cila është lidhja e dy kompanive fituese, Kutia Press dhe Agon Halili?
Sipas Agjencisë së Regjistrimit të Bizneseve, dy kompanitë fituese të tenderit “Platforma gjithëpërfshirëse për zhvillim ekonomik, inovacion dhe turizëm”, kanë pronarë të ndryshëm.
Por, befasisht, numri kontaktues figuron i njëjti te të dy kompanitë.
Në ARBK, kompania individe Agon Haliti, e regjistruan në 2020 ka të vendosur numrin kontaktues. Që është numri i njëjtë në ARBK te biznesi i ri “Kutia Press” e hapur para dy muajve.
Gazeta Insajderi ka hulumtuar rreth “Agon Halitit” i cili brenda dy viteve ka fituar gjashtë tendera nga komuna e Ferizajit.
Siç shfaqet te E-Prokurimi një tender figuron ‘i përfunduar’, ndërsa pesë tendera tjerë janë në ‘realizim’.
Gazeta Insajderi, ka dërguar pyetje në komunën e Ferizajt, për të marrë ndonjë shpjegim, mirëpo deri në publikimin e këtij teksti nuk kanë kthyer ndonjë përgjigje.
Insajderi para disa muajve ka raportuar se si pushteti i PDK-së në Ferizaj, komunës që drejtohet nga Agim Aliu, ishte denoncuar publikisht për një tender që ia dha një firme vetëm disa ditë pasi që e njëjta ishte krijuar.
“Skemë e organizuar për vjedhje të buxhetit”, ka shkruar përfaqësuesi i një organizate.
Një hulumtim i Insajderit ka zbuluar se edhe pse firma është e re, numri kontaktues është i njëjti me firmën e biznesmenit Agon Halili, i cili për dy vite ka marrë gjashtë tender në këtë komunë.
