Deputetja e Vetëvendosjes, Arbëreshë Kryeziu, ka akuzuar partitë tjera për bllokimin e Kuvendit të Kosovës.
Ajo ka përsëritur qëndrimet e partisë së saj se partitë s’po e njohin “të drejtën ekskluzive” të Vetëvendosjes për të propozuar një kandidat të tyre për kryerparlamentar.
“Njësoj siç ndodhi para disa javësh, kur votohej raporti i komisionit për verifikimin e mandatëve – një proces që u bllokua për disa seanca me radhë – sot po ndodh e njëjta gjë. Atëherë, si edhe tani, janë të njëjtat parti që po vazhdojnë të bllokojnë konstituimin e Kuvendit. Ne, që nga fillimi, kemi qenë të gatshëm të marrim pjesë në procesin e votimit dhe vazhdojmë të jemi të tillë edhe sot. Ne do të votojmë për formimin e këtij komisioni, sepse besojmë se është shumë e rëndësishme të dalim nga kjo bllokadë dhe të ecim përpara me konstituimin e Kuvendit – fillimisht me hapin formal dhe më pas me procedurat e tjera të nevojshme”.
“Fatkeqësisht, deri më tani nuk kemi parë ndonjë reflektim nga partitë opozitare. Përkundrazi, ato vazhdojnë të mbajnë të njëjtin qëndrim bllokues, duke refuzuar pjesëmarrjen në votim, edhe pse janë të vetëdijshme që ky proces nuk mund të ecë përpara pa pjesëmarrjen e tyre. Vendimet e Gjykatës Kushtetuese kanë qenë të qarta: deputetët duhet të marrin pjesë në këtë proces dhe të japin kontributin e tyre në konstituimin e Kuvendit. Prandaj, është shqetësuese që pikërisht deputetët e këtyre partive po zgjedhin të mos marrin pjesë në votim, duke kontribuar më tej në vazhdimin e kësaj bllokade”.
“Nuk e kuptojmë pse ne duhet t’i nënshtrohemi një procesi të tejzgjatur politik, në të cilin duhet të presim që të tjerët të vendosin se kush është fituesi i zgjedhjeve dhe pastaj të na japin të drejtën për të propozuar kandidatin për kryetar të Kuvendit. Kjo është një e drejtë ekskluzive e Lëvizjes Vetëvendosje, si fituese e zgjedhjeve dhe nuk mund të funksionojmë nën kushtëzimet që po na vendosin partitë opozitare”.
Ajo përsëriti se “në të ardhmen, në procese të ngjashme, edhe partitë e tjera do të propozojnë kandidatë për pozitat udhëheqëse dhe ne mund të kemi dilemat tona ndaj atyre emrave – por nuk do t’i bllokojmë, sepse do t’i respektojmë si kandidatë të subjekteve të tyre politike.
“Kjo nuk është çështje emrash – nuk është problemi tek zonja Haxhiu apo ndonjë tjetër që mund të propozojë Vetëvendosje. Kjo është një arsye e krijuar për të mos e çuar përpara konstituimin e Kuvendit”.
Ajo tha se PDK po vazhdon të shtojë emra në listën që nuk do t’i votonin për kryerparlamentar.
“Realisht, nuk është problemi te zonja Haxhiu– problemi është se ata nuk po duan të ecin përpara me konstituimin e Kuvendit dhe me procedurat e tjera institucionale. Ata po vazhdojnë me të njëjtat justifikime për javë të tëra, në vend se ta votojnë propozimin dhe ta vendosin vendin në rrugën e funksionalitetit institucional”.
Kryeziu bëri me dije se nuk do të ndryshojnë në propozimin e tyre.
“Kemi vendosur brenda grupit tonë parlamentar që kandidatja për këtë post të jetë zonja Hajdari dhe presim që ky vendim të respektohet”.
“Gjithashtu, jemi ende në pritje të një opinioni nga Gjykata Kushtetuese për çështje shumë të rëndësishme, përfshirë edhe procesin e numërimit të votave të mërgatës. Mendojmë se është thelbësore të kemi qartësi kushtetuese për të gjitha këto procese, në mënyrë që vendi të ecë përpara me institucione funksionale dhe një Kuvend që punon për qytetarët”./Express/
