Një grua nga Peja, e punësuar si asistente në një zyrë avokatie, ka denoncuar një rast të rëndë dhe tronditës të shantazhit dhe kërcënimit të vajzës së saj, përmes rrjeteve sociale. Përmes një deklarate të detajuar dhënë para hetuesve policorë, ajo ka zbuluar një skemë presioni psikologjik dhe kërkese për para, që sipas saj ka për qëllim poshtërimin e vajzës dhe shkatërrimin e reputacionit të saj familjar.
Sipas dokumentacionit që ka siguruar Sinjali, më 19 maj 2025, rreth orës 21:38, viktima A.M., 48 vjeçare, ka pranuar një mesazh në Facebook nga një profil me emrin “Beni Berisha”. Mesazhi ishte i qartë:
“Kam pasur lidhje me vajzën tënde E.M. Jam ndarë prej saj dhe si dëmshpërblim dua 20 mijë euro. Kam foto të saj intime dhe nëse nuk ma jep shumën deri më 29 maj, do t’i publikoj ato dhe do t’ia dërgoj familjes së burrit të saj.”
Shantazhuesi shkon edhe më tej, duke e paralajmëruar se nëse ajo njofton Policinë ose ndërmerr ndonjë veprim kundër tij, ai do t’i shpërndajë menjëherë fotografitë. Sipas udhëzimeve që i ka dërguar, paratë duhet t’i dorëzohen dhëndrit të saj, i cili më pas duhet t’i lërë tek ura e Zajmit në Klinë, pa bërë asnjë veprim tjetër.
“Pasi t’i marr paratë, i fshij fotot”, ka thënë ai.
Gruaja ka deklaruar se nuk është hera e parë që përballet me ngacmime të tilla. Më 30 prill 2025, përmes Instagramit, një tjetër profil me emrin “Gent_rithyseni” e kishte kontaktuar me fjalët: “Shiko vajzën tënde”, por pa dërguar foto.
Në deklaratën e saj para Policisë, A.M. ka pohuar se ka dyshime të drejtpërdrejta ndaj një familjari të afërt – agjës së vajzës, me emrin M.B, banues në Pejë. Ajo tregon se ky person nuk ka kontaktuar me vajzën, por u ka dërguar mesazhe provokuese asaj vetë, djalit të saj dhe dhëndrit, duke përdorur shprehje fyese dhe denigruese:
“Shikoje E.M sa e ëmbël është“.
E frikësuar për sigurinë e vajzës, A.M. ka theksuar se ndjehet e kërcënuar dhe e pasigurt, duke shprehur shqetësimin se vajza e saj, e martuar dhe vetëm 25 vjeç, mund të përballet me pasoja të rënda nëse materiali që përmendet publikohet.
Ajo ka konfirmuar se posedon në telefon të gjitha mesazhet dhe komunikimet kërcënuese, të cilat është e gatshme t’ua dorëzojë autoriteteve për hetim të mëtejshëm.
Rasti është hapur zyrtarisht si “Shantazh” dhe është në trajtim nga njësitë relevante të Policisë dhe Prokuroria Themelore.
Hetimet janë duke vazhduar për të identifikuar autorin e vërtetë dhe për të parandaluar ndonjë dëm të mundshëm që mund t’i shkaktohet viktimës apo familjes së saj.
