Gjykata e OKB-së mbi krimet e luftës, në Hagë, më 27 maj 1999, konfirmoi se ka paditur atëkohë presidentin jugosllav, Sllobodan Millosheviq si kriminel lufte.
Më 1 prill 2001, Millosheviq arrestohet në Beograd. Ndërsa me urdhrin e qeverisë serbe, më 28 qershor ekstradohet në Hagë, pasi paraprakisht është bërë publike aktakuza për krime lufte në Kosovë.
Më vonë, Millosheviq akuzohet për krime edhe në Kroaci dhe gjenocid në Bosnje-Hercegovinë.
Gjykimi kundër Millosheviqit në Hagë ka filluar me 12 shkurt të vitit 2002.
Nxjerrja e dëshmive për krime në Kosovë e Kroaci dhe gjenocid në Bosnje e Hercegovinë, ka zgjatur deri më 25 shkurt 2004. Mbrojtja e tij ka filluar çështjen në fund të gushtit të atij viti.
Gjykimi kundër Millosheviqit është ndërprerë dhjetëra herë për shkak të problemeve kardiovaskulare dhe tensionit të lartë të gjakut.
Më 11 mars 2006 në ora 9:30, Millosheviq, i cili njihet si Kasapi i Ballkanit, u gjet i vdekur në qelinë e tij.
