Profesori mitrovicas, Festim Kutllovci, ka bërë të ditur se ka pranuar njoftimin zyrtar nga Prokuroria Speciale se është hedhur poshtë kallëzimi penal ndaj tij që ishte bërë nga deputeti i Vetëvendosjes, Armend Muja, raporton Gazeta Online Veriu.info.
Ky kallëzim penal ishte bërë me pretendimet e deputetit Muja për keqpërdorim të pozitës zyrtare gjatë kohës sa profesori Kutllovci ishte pjesë e bordit të KPMM-së.
“Në këtë kallëzim të pabazuar, emri im dhe gjithë bordit të KPMM-es si dhe drejtorit të KPMM-es u përmend lidhur me gjoja keqpërdorim të detyrës zyrtare gjatë kohës sa kemi qenë në Bordit të Komisionit të Pavarur për Miniera dhe Minerale (KPMM).” – shkruan Kutllovci.
Ai ka thënë se sot u vërtetua se pretendimet e deputetit Armend Muja ishin shpifje dhe pretendime të pabazuara.
Kutllovci ka paralajmëruar për shqyrtimin e kallëzimit penal ndaj Armend Mujës për dëmtim të reputacionit profesional dhe personal.
Njoftimi i profesorit Festim Kutllovci:
Deklaratë publike – E vërteta del në shesh
Të nderuar qytetarë, miq dhe bashkëpunëtorë,
Sot, pas një procesi të gjatë dhe të ngarkuar emocionalisht për mua dhe familjen time, kam pranuar njoftim zyrtar nga Prokuroria Speciale e Republikës së Kosovës, përmes së cilës është hedhur poshtë kallëzimi penal ndaj meje, i bërë publikisht vite më parë nga deputeti i Kuvendit të Kosovës, z. Armend Muja.
Në këtë kallëzim të pabazuar, emri im dhe gjithë bordit të KPMM-es si dhe drejtorit të KPMM-es u përmend lidhur me gjoja keqpërdorim të detyrës zyrtare gjatë kohës sa kemi qenë në Bordit të Komisionit të Pavarur për Miniera dhe Minerale (KPMM).
Në thelb të akuzës ishin pretendime absurde dhe të pavërtetuara, sikur përmes një vendimi “të paligjshëm” t’i ishin dhënë zonat me interes të Ndërmarrjes “Trepça” një investitori privat, përkatësisht rezervat minerale të plumbit dhe zinkut në Zjaqë, Vllahi dhe Gumnishtë – të cilat z. Muja i përshkruante me një vlerë hipotetike prej 1 miliardë eurosh.
Sot, drejtësia vërtetoi se ato ishin shpifje të rënda dhe pretendime tërësisht të pabazuara, të cilat nuk qëndrojnë as në fakte, as në ligj, e as në realitet.
Deputetë si z. Armend Muja, të cilët zgjedhin të ndërtojnë karrierën politike jo mbi parime, ide dhe integritet, por mbi shpifje, skandale të fabrikuara dhe manipulim publik, nuk i shërbejnë interesit të qytetarëve dhe as së ardhmes së Kosovës. Përkundrazi, ata e dëmtojnë seriozisht besimin e qytetarëve në institucionet e shtetit dhe e përdhosin moralin publik në emër të përfitimeve politike personale.
E kam thënë dhe do ta përsëris: besimi im në institucionet e drejtësisë së Republikës së Kosovës ka qenë i plotë. Kam pritur me durim e besim që e vërteta të dalë në pah, dhe sot ajo foli qartë.
Falënderoj nga zemra familjen time për përkrahjen e palëkundur dhe përballimin me dinjitet të kësaj periudhe të vështirë.
Duke qenë se dëmi i shkaktuar ndaj meje dhe imazhit tim publik është real dhe i matshëm, në konsultim me avokatin tim do të shqyrtoj ngritjen e një kallëzimi penal për shpifje dhe dëmtim të reputacionit tim profesional dhe personal.
Kosova ka nevojë për institucione të forta dhe për përfaqësues që udhëhiqen nga përgjegjësia, jo për politikanë që ndërtojnë “kredibilitetin” e tyre mbi baltë dhe mashtrime.
Zëri i shpifësit është i zhurmshëm, por zëri i së vërtetës është i pathyeshëm.
Me respekt,
Prof. asoc. dr. Festim Kutllovci
