Ish-deputeti i Kuvendit të Kosovës, Dardan Sejdi, ka shprehur shqetësimet e tij në lidhje me vendimin e ZRrE-së që parasheh largimin e një numri të madh të bizneseve nga furnizimi përmes shërbimit universal dhe kalimi i tyre në tregun e lirë të energjisë, i cili do të fillojë të zbatohet nga nesër.
Ai ka bërë me dije se një veprim i tillë do të jetë shkatërrues për shumë biznese.
Në profilin e tij në “Facebook”, Sejdiu ka shkruar se politika po e çon ekonominë drejt humnerës, me buzëqeshje dhe fjalë të bukura.
“Po derisa po kërkojm pak qetësi, politika po e çon ekonominë drejt humnerës, me buzëqeshje dhe fjalë të bukura. E tash, 250 euro/MËh nuk është thjesht një çmim, është diagnozë! Për 26 vjet, Kosova ka operu pa një model zhvillimor të mirëfilltë. Ka jetu me idenë se tregu i lirë rregullon gjithçka vetë. Se shteti duhet me u tërheq. Se industria vendore ia del vetë me u zhvillu. Sot, e vërteta po troket: ky “treg i lirë” qe 26 vjet i ka lanë prodhuesit dhe ekonominë tonë “cullak” para krizave e monopolove të privatizuara publike, pa asnjë mjet e qeveri për t’i mbrojtur”, ka shkruar ai, duke dhënë detaje tjera.
“1300 kompani që janë gati gjysa e ekonomisë tonë, janë në protestë. 143 mijë punëtorë janë në rrezik. 4.5 milionë euro tatime në ditë, apo mbi 1.6 miliardë euro në vit, i paguajnë këto biznese, burim i drejtpërdrejtë për buxhetin. Edhe naj ditë! Në një situatë të rënduar nga inflacioni, një rritje e tillë e çmimit të energjisë është thjesht përshpejtim i krizës. Si me i dhënë gaz veturës kur po shkon drejt murit. Ndërkohë, ja çka paguajnë prodhuesit në vendet afër: Bulgaria: ~90 €/MËh; Serbia: ~100–120 €/MËh; Turqia: ~80 €/MËh; Kosova: 250 €/MËh”, ka shkruar ai.
