Operacioni i gjerë kundër krimit të organizuar sot, i koduar “Qielli i Thyer”, ka përfshirë edhe rajonin e Pejës, ku janë arrestuar disa persona të dyshuar për përfshirje në trafik ndërkombëtar të narkotikëve dhe pastrim parash.
Sipas burimeve të Sinjalit, në Pejë janë ndaluar Blerim Sharapolli, Kenan Brovina, Abedin Gjakova si dhe Rexhep Nikqi, pronar i kompanisë së karburanteve “Gryka Petroll”, përcjell Insajderi.
Të arrestuarit dyshohen për veprat penale krim i organizuar, trafikim me narkotikë dhe pastrim parash, të cilat, sipas Prokurorisë Speciale, janë kryer përmes përdorimit të aplikacionit të enkriptuar SkyECC – një mjet i përdorur gjerësisht nga rrjete kriminale për komunikim të fshehtë.
Operacioni është zhvilluar njëkohësisht në Prishtinë, Prizren, Pejë dhe Gjilan, me pjesëmarrjen e rreth 600 zyrtarëve policorë dhe është rezultat i një hetimi të gjatë të përkrahur nga autoritetet e Belgjikës, Holandës dhe Europol-it.
Gjatë bastisjeve në 47 lokacione janë sekuestruar: Lëndë narkotike, 129 vetura, 134,900 € para të gatshme, 20,040 franga zvicerane, 13,000 € para të falsifikuara, 36 armë, 1,569 fishekë, 9 orë dore luksoze, laptopë, telefona dhe pajisje të tjera, si dhe një makinë për paketimin e heroinës dhe kokainës.
Po ashtu janë ngrirë 400 mijë euro në llogari bankare, si dhe janë vendosur urdhër-ndalime mbi pasuritë e paluajtshme të të dyshuarve.
Operacioni u udhëheq nga Prokuroria Speciale e Kosovës (PSRK) dhe vjen si pjesë e përpjekjeve për të çmontuar rrjetet e krimit të organizuar në vend dhe më gjerë.
“Operacioni ‘Qielli i Thyer’ u mbështet nga një shkëmbim efektiv i të dhënave me autoritetet e Belgjikës, Francës, Holandës dhe Europol-it, që mundësuan një koordinim të ngushtë ndërkombëtar. Prokurori i PSRK-së ishte i pranishëm gjatë realizimit të urdhër kontrollit dhe e ka udhëhequr drejtpërdrejt operacionin”, thuhej në njoftimin e Prokurorisë Speciale.
