Ambasadori i Britanisë së Madhe në Kosovë, Jonathan Hargreaves, ka zhvilluar dje një vizitë në kuadër të ushtrimit ndërkombëtar “Defender Europe 25”, nikoqir i të cilit këtë vit është Kosova.
Përmes një postimi në rrjetet sociale, ambasadori britanik vlerësoi lart aftësitë e Forcës së Sigurisë së Kosovës për të bashkëpunuar me forcat aleate, përfshirë ato nga Shtetet e Bashkuara, Shqipëria, Kroacia, Maqedonia e Veriut dhe Bullgaria.
“Sot vizitova ushtrimin DEFENDER EUROPE 25, ushtrimi vjetor më i madh i Ushtrisë Amerikane. Ky ushtrim demonstroi aftësinë e Forcës së Sigurisë së Kosovës për të bashkëpunuar me forcat nga 🇺🇸 SHBA, 🇦🇱 Shqipëria, 🇭🇷 Kroacia, 🇲🇰 Maqedonia e Veriut dhe 🇧🇬 Bullgaria në vendosjen strategjike të forcave, duke treguar ndërveprueshmërinë mes aleatëve dhe partnerëve të NATO-s”, shkroi ai.
Hargreaves gjithashtu u ndal te përvoja e një pjestarje të FSK-së, e cila ka ndjekur Akademinë Mbretërore Ushtarake Sandhurst në Mbretërinë e Bashkuar, duke theksuar ndikimin që këto trajnime kanë në ndërtimin e kapaciteteve të FSK-së.
“Ishte gjithashtu kënaqësi të takohesha me alumnen e 30-të të FSK-së nga Akademia Mbretërore Ushtarake Sandhurst në 🇬🇧 Mbretërinë e Bashkuar. Diskutuam për ato që ka mësuar në Britani dhe mënyrën si po i përdor ato sot për të sjellë ndryshime në FSK, ndërsa ajo zhvillohet si një forcë e sigurisë e përafruar me standardet e NATO-s”, tha ai.
