Brenda degës së Lidhjes Demokratike të Kosovës (LDK) në Vushtrri, gara për përzgjedhjen e kandidatit për kryetar komune po hyn në një fazë vendimtare. Sipas burimeve brenda partisë, më 8 qershor pritet që kryesia lokale të përcaktojë jo vetëm listën për kandidatët për Asamblenë Komunale, por edhe kandidatin për të parin e komunës, raporton Periskopi.
Dy emra po qarkullojnë në qarqet e brendshme të LDK-së, ish-kryetari Xhafer Tahiri dhe Adnan Lahu, një figurë e re brenda strukturave të partisë.
Rikthimi i mundshëm i Xhafer Tahirit – një ‘bast’ i rrezikshëm?
Xhafer Tahiri, udhëhoqi Vushtrrinë nga viti 2017 deri në 2021. Fitorja e tij në vitin 2017 u arrit përmes një koalicioni të befasishëm me Lëvizjen Vetëvendosje, për të rrëzuar PDK në këtë komunë.
Megjithatë, qeverisja e Tahirit u shoqërua me akuza të shumta për keqmenaxhim dhe klientelizëm, të cilat duket se e ndëshkuan në vitin 2021, kur humbi garën ndaj Ferit Idrizit të PDK-së – ndonëse sondazhet paraprake e favorizonin.
Tahiri gjithashtu doli dobët edhe në garën e brendshme për deputet në vitin 2024, duke marrë vetëm rreth 2,000 vota, në një proces të kontestuar nga të dyja palët për manipulim votash – një sinjal i qartë se pozicioni i tij brenda partisë është dobësuar dhe se rikandidimi i tij nuk do të kalojë pa tensione të brendshme.
Adnan Lahu – profili i një kandidati që synon konsolidim të brendshëm
Në krahun tjetër qëndron Adnan Lahu, një figurë më e re dhe më pak e kontestuar brenda LDK-së.
Lahu ka qenë pjesë aktive e partisë për më shumë se 15 vjet dhe njihet për angazhimin e tij të hershëm në Rininë e LDK-së.
Në kohën kur Tahiri drejtonte komunën, Lahu kishte pozitën e drejtorit të Kadastrit dhe Gjeodezisë, çka tregon për një marrëdhënie të ngushtë dhe të hershme bashkëpunimi mes tyre – por që tash mund të kthehet në garë direkte.
Përkundër faktit se në zgjedhjet parlamentare të vitit 2021 nuk arriti të marrë vota të mjaftueshme për të hyrë në Kuvend, Lahu doli ndër asamblistët më të votuar të LDK-së në shkallë vendi dhe më i votuari në Vushtrri.
Kjo mbështetje e bën atë një kandidat të fuqishëm dhe të preferuar nga baza. Aktualisht, ai drejton grupin e asamblistëve të LDK-së në Kuvendin Komunal – një pozicion që e ka forcuar si zë kritik i qeverisjes aktuale të PDK-së, por edhe si figurë që mund të bëjë bashkimin e brendshëm të LDK-së./Periskopi/
