Bosi i heroinës i arrestuar dje në aksionin e Prokurorisë Speciale, Shemsi Bahtiri, është përjashtuar nga Lëvizja Vetëvendosje, transmeton Gazeta Online Veriu.info.
Bahtiri nëpërmjet rrjeteve sociale postonte fotografi me drejtuesit e LVV-së, Albin Kurtin dhe Xhelal Sveçlën.
Foto: Albin Kurti dhe Shemsi Bahtiri (bosi i heroinës i arrestuar nga Policia e Kosovës)
Bahtiri ishte pjesë e Degës Medrese të Lëvizjes Vetëvendosje në Prishtinë.
Ai është arrestuar dje nën dyshimet për trafikimin me narkotikë.
Sipas burimeve, Bahtiri dyshohet të jetë njëri prej kryesorëve të grupit kriminal prej 22 anëtarëve që u kap dje pas një aksioni të suksesshëm të Policisë, Prokurorisë e INTERPOL-it.
Ndërkaq, sipas kërkesës për paraburgim nga Prokuroria Speciale thuhet se ekziston dyshimi i bazuar se 22 të pandehurit, në periudhën kohore nga fillimi i vitit 2019 e deri më datën 03.06.2025, në Kosovë dhe shtete të tjera, kanë blerë e shitur droga të llojeve të ndryshme me qëllim të përfitimit të drejtpërdrejtë të dobisë financiare për vete./Veriu.info
