Analisti politik, Dardan Sejdiu, ka thënë se kryeministrin në detyrë, Albin Kurtin, po e bëjnë më të pushtetshëm, më të rëndësishëm e më lojtar sesa realisht është.
Ai kritikoi skenën politike për mosveprime politike, duke thënë partitë politike nuk po duan të veprojnë politikisht.
“Këtu vetëm një vendim duhet i subjekteve tjera për marrëveshje. Në momentin që ky vendim merret, marrëveshja është e lehtë. Kur bëhet marrëveshja, veprimi politik është i pashmangshëm. Pra, këta këtë vendim s’po e marrin”.
“Në këtë mozaik të gjërave, normalisht që Kurti duket i rëndësishëm, i gjithëpushtetshëm, po e luan lojën. Por, kurrkush s’po luan, kurrkush s’po vepron politikisht. Deputetllëku nuk matet vetëm me forcën e votës. Ne kemi qenë 16 deputetë, ‘patare’ një Kosovë e kemi bërë”, tha Sejdiu .
Tutje, ai u shpreh se gjërat janë më të thjeshta sesa po paraqiten, por sipas tij, vyen një vendim, teksa shtoi se duhet kuptuar motivin e politikanëve në Kosovë se a janë në politikë për të mirën e përgjithshme.
“Nuk është politika me sodit në konferenca për shtyp. Serioziteti i angazhimit në kuvend nuk definohet me numra të partisë në kuvend. Këtë duhet ta kuptojmë. Nuk mund ta thjeshtëzojmë me idenë që ta shpërfaqim ende më shumë që kryeministri në detyrë po e bllokon vendin”.
“Organizimi politik partiak nëse beson se diçka nuk është në interes të vendit, edhe më e dëmshme është të mos veprosh. Kur kam besuar unë se diçka është në dëm të vendit, kam marrë veprim politik”, tha ai, në Rubikon në Klan Kosova.
