Reperi Getoar Aliu, i njohur me emrin artistik Getinjo, pretendon se Albin Kurti mund ta ndihmojë në nismën e tij për të ndaluar njerëzit që ofendohen në Tik-Tok.
Kësisoj, ai ka iniciuar një kërkesë publike për kryeministrin e Kosovës të mërkurën me qëllim ndërhyrjen e tij në platformën kineze të internetit.
Ndonëse qeveria nuk ka asnjë mekanizëm për ndreqjen e këtij problemi, reperi ka kërkuar zëshëm nga Kurti që të marrë masa ndaj të gjithë personave që po shahen mes vete në aplikacion.
Sipas tij, ndërhyrja e Kurtit në këtë çështje do të shpëtonte shumë njerëz.
“Albin Kurti po të lus publikisht me ndërmarrë diçka për njerëzit që po shahen në aplikacionin TikTok”, i është drejtuar Getinjo, kryeministrit Kurti. “Beso që ki me i shpëtu shumë njerëz”.
Tik-Tok është një platformë kineze e shpërndarjes së video-materialeve në internet.
Ai është aplikacioni i vetëm që nuk është në pronësi të gjigantit Facebook, por që gjendet në listën e pesë aplikacioneve më të shkarkuara.
Vitin e kaluar, ish-presidenti amerikan, Donald Trump pati nënshkruar urdhër ekzkutiv për të ndaluar shkarkimet e reja të TikTokut në SHBA.
Mirëpo presidenti aktual amerikan, Joe Biden, ka pezulluar urdhrin e paraardhësit të tij.
