Kryeministri në detyrë, Albin Kurti, ka pritur sot në takim ish-presidentin kroat, Stipe Mesiq. Në këtë takim, Kurti ka shprehur mirënjohjen për kontributin e Mesiq gjatë viteve 80-ta dhe 90-ta kur edhe kishte dalë publikisht në mbrojtje të të drejtave të shqiptarëve ndërkohë që më vonë, nga pozita e Presidentit të Kroacisë, Mesiq i kishte dhënë mbështetje të palëkundur për përpjekjen tonë për liri dhe pavarësi.
Në këtë takim është diskutuar për zhvillimet aktuale, përfshirë edhe bashkëpunimin në rritje ndërmjet Republikës së Kosovës dhe Republikës së Kroacisë.
“U theksua rëndësia e thellimit dhe zgjerimit të këtij bashkëpunimi në të gjitha fushat, e posaçërisht në atë të mbrojtjes dhe sigurisë. U konstatua që gjendja në rajonin e Ballkanit është shumë më e mirë se para tri dekadave, por edhe që disa probleme janë të vjetra nga ajo kohë” njofton ZKM.
