Ish deputeti i Kosovës, Bekim Haxhiu ka reaguar pas ngjarjeve të djeshme në ndeshjen e futbollit Shqipëri – Serbi.
Policia Shqiptare nuk lejoi vendosjen e flamujve të UÇK-së në stadiumin “Air Albania”, teksa kjo nuk i la përshtypje pozitive Haxhiut.
Ai thotë se pa këtë flamur nuk do kishim liri dhe se nuk është problem flamuri, por krenari kombëtare.
Ja postimi i tij:
“Flamuri i UÇK-së nuk është problem, është krenari kombëtare!
Është absurde dhe e papranueshme që në stadiumin kombëtar të pengohet shfaqja e flamurit të UÇK-së, simbol i lirisë, sakrificës dhe përkushtimit për atdheun. Pa këtë flamur, nuk do të kishim liri. Pa këtë flamur, nuk do të kishte as kombëtare kuqezi të përbashkët që sot e përjetojmë!
Flamuri i UÇK-së është flamur fitoreje, jo urrejtjeje. Është dëshmi e një populli që ka luftuar për ekzistencë, për liri, duke derdhur gjak, mund dhe djersë.
Kur Federata Shqiptare e Futbollit ndalon këtë simbol të shenjtë, ndërkohë që bashkëorganizon turne me Federatën Serbe, po dërgon mesazhin e gabuar:
Se për interesa personale FSHF është e gateshme të fshijë sakrificën dhe historinë tonë të lavdishme.
UÇK-ja nuk është provokim. Është kujtesë që jemi të lirë, falë atyre që nuk u dorëzuan”, shkruan ai në Facebook.
