Ish-deputeti i PDK-së, Xhavit Haliti, ka komentuar takimin e fundit të Kryeministrit në detyrë Albin Kurti, me Kryetarin e Mitrovicës, Bedri Hamza duke theksuar se, edhe pse nuk ka informacion të plotë për arsyen e këtij takimi, nuk e konsideron të dëmshëm.
Haliti për GazetaBlic ka theksuar se Mitrovica është një komunë me shumë probleme dhe se bashkëpunimi ndërmjet institucioneve lokale dhe atyre qendrore është domosdoshmëri, veçanërisht kur bëhet fjalë për situatën në veriun e Kosovës.
Sipas tij, një bashkëpunim i tillë është thelbësor për të siguruar stabilitet dhe zhvillim për të gjitha komunat e Kosovës.
“Nuk kam informata për arsyen e takimit. Ndoshta, si Kryeministër, e ka takuar Kryetarin e Mitrovicës, pasi para disa ditësh janë takuar në një ndeshje sportive. Por, edhe nëse e ka takuar për mundësinë e ndonjë marrëveshje lidhur me krijimin e institucioneve, takimin nuk e quaj të dëmshëm. Uroj që të kenë arritur ndonjë marrëveshje për ç’bllokimin e krijimit të institucioneve. Mitrovica është komunë me shumë probleme, dhe duke pasur parasysh situatën në veriun e Kosovës, konsideroj se është domosdoshmëri që të ketë bashkëpunim ndërmjet institucioneve lokale dhe atyre qendrore”, tha Haliti për GazetaBlic.
