Avokati Arianit Koci, i cili aktualisht ndodhet në Serbi, ka folur lidhur me ndalimin e ish-policit të Kosovës, Arbnor Spahiu, dhe akuzat që janë ngritur ndaj tij.
Në një lidhje direkte të martën në emisionin “Edicioni Special” në Klan Kosova, Koci deklaroi se kallëzimi penal kundër Spahiut është bërë nga Agjencia Serbe e Inteligjencës (BIA) dhe sipas tij, i gjithë rasti është i pabazuar.
“Unë kam marrë dokumentacionin komplet të pretendimeve të prokurorisë, pra kallëzimin penal e ka bërë BIA serbe, organi i sigurisë dhe është komplet i pabazuar”, tha ai.
Ai shtoi se në kallëzim figuron që klienti i tij ishte snajper në njësinë ku shërbente, por kjo, sipas tij, është e pavërtetë.
“Gabimi i parë është se këtu klienti im paraqitet si snajperit në njësitin e tij, ai së pari nuk ka qenë kurrë snajperit dhe njësiti i tij nuk ka fare snajper. Mbi të gjithë, në kohën e sulmit në Banjskë ai nuk ka qenë fare pjesëtar i policisë”, theksoi Koci.
Sipas avokatit, këto pasaktësi në kallëzimin penal tregojnë qartë se kemi të bëjmë me një rast të ndikuar politikisht.
“Unë i kam identifikuar disa gabime në atë kallëzimin penal dhe të gjitha këto më kanë bindur që ky është një persekutim politik dhe nuk ka të bëjë fare me drejtësi”, u shpreh ai.
Ai theksoi tutje se institucionet e larta të Kosovës duhet të reagojnë.
“Për këtë arsye unë besoj që tash është koha që të reagojë edhe kryeministri edhe presidentja, nuk mjafton që vetëm Ministria e Punëve të Jashtme të angazhohet për këtë çështje”, shtoi Koci.
