Deputeti i PDK-së, Nait Hasani, ka deklaruar sot pas dështimit të 30-të me radhë që të konstituohet Kuvendit se nuk do të marrë pjesë më në seanca.
Në lidhje me këtë deklaratë të Hasanit ka reaguar drejtori ekzekutiv i KDI-së, Ismet kryeziu.
Kryeziu tha në reagimin e tij se “deputeti Nait Hasani, përmes këtij veprimi sot tregoi se nuk po ikën nga përgjegjësia. Përkundrazi, po e mbron atë me një akt proteste, bojkotim.
”Kur pas mbi 30 tentativash Kuvendi s’po arrin të konstituohet, është e qartë se problemi nuk është më teknik, është politik, është moral.Deputeti Nait Hasani, përmes këtij veprimi sot tregoi se nuk po ikën nga përgjegjësia. Përkundrazi, po e mbron atë me një akt proteste, bojkotim. Politika, më shumë se votë e pushtet, është përgjegjësi dhe llogaridhënie – dhe këtë do duhej ta bënin edhe 119 deputetët e tjerë”, ka shkruar Kryeziu.
Madje sipas Kryeziut një kuvend pa diskutim, pa votim, pa përfaqësim duhej të bojkotohej nga të gjithë deputetët.
”Përndryshe, një Kuvend pa diskutim, pa votim, pa përfaqësim, dhe me një udhëheqës që e hap e e mbyll sipas tekeve personale e të partisë që i takon, duhej të bojkotohej nga të gjithë deputetët. Deputetët nuk duhet të heshtin. Nuk duhet të bëhen pjesë e bllokadës që po e vendos shtetin në pauzë dhe po e dëmton demokracinë”, ka shtuar më tutuje ai.
