Ministria e Nenad Rashiqit e Qeverisë Kurti, ka shpenzuar mbi 112 mijë euro nga buxheti i shtetit për paga të 19 punonjësve nga komuniteti serb, të cilët nuk kanë vijuar fare në punë gjatë vitit 2024. ZKA e ka përfshirë këtë rast si gjetje zyrtare në raportin vjetor të auditimit, duke e cilësuar pagesën të dëmshme për buxhetin e shtetit. Ky problem, që është evidentuar edhe në auditimet e kaluara, po vazhdon pavarësisht rekomandimeve të përsëritura për ndërprerjen e praktikave të tilla.
Një praktikë e kritikuar ndër vite nga Zyra Kombëtare e Auditimit (ZKA) po rezulton ende e gjallë në institucionet shtetërore. Një grup prej 19 punonjësish të integruar nga komuniteti serb, të sistemuar në Ministrinë përkatëse me vendim qeveritar që nga viti 2015, vazhdojnë të paguhen pa dëshmi për prezencë në vendin e punës.
Sipas raportit më të fundit të ZKA-së, për vitin 2024 këta punonjës i kanë kushtuar buxhetit të shtetit 112,558 euro, ndonëse nuk ka asnjë evidencë për vijueshmërinë e tyre në punë, as përmes sistemit elektronik, as përmes librave evidentues – siç kërkohet me ligj.
Auditimi konstaton se edhe pas vitesh raportimesh të përsëritura për këtë problem, situata ka mbetur e pandryshuar. Ministria, sipas raportit, ka filluar vetëm në vitin 2025 të mbajë evidencë për prezencën në punë, por rezultatet e kësaj praktike pritet të verifikohen në auditimet e ardhshme.
Ligji e kërkon, praktika e shpërfill
Sipas nenit 9 të Rregullores (QRK) Nr.107/2022 për orarin e punës dhe pushimet e zyrtarëve publikë, çdo zyrtar është i obliguar të regjistrojë vijueshmërinë në punë – përmes librave manualë ose sistemit elektronik, varësisht nga praktika e brendshme e institucionit.
Ndërkohë, Rregullorja më e re (QRK) Nr.04/2024 shkon edhe më tej duke përcaktuar se vetëm regjistrimi elektronik konsiderohet si mënyrë e vlefshme e evidencës së vijueshmërisë, përveç rasteve të rralla kur ka pamundësi teknike.
Megjithatë, për 19 punonjësit e përfshirë në këtë çështje, të cilët janë integruar në institucion përmes një vendimi të veçantë qeveritar (nr. 06/39, datë 22.07.2015), nuk ekziston asnjë formë e dokumentuar e regjistrimit të pranisë në punë.
Sipas zyrtarëve përgjegjës, këta punonjës nuk kanë paraqitur as dëshmi të angazhimit në detyrat zyrtare.
Dëm i drejtpërdrejtë i buxhetit:
ZKA e cilëson këtë situatë si shkelje të rëndë të parimeve të transparencës dhe llogaridhënies, dhe si dëm të drejtpërdrejtë ndaj buxhetit të ministrisë. Në raport theksohet se pagesat për punonjës që nuk kanë dëshmi për vijueshmëri në punë “janë të paarsyetuara” dhe bien ndesh me parimet themelore të menaxhimit të parasë publike.
“Pagesat e punonjësve në mungesë të dëshmive për vijueshmëri në punë dhe të angazhimit për detyrat zyrtare, konsiderohen si pagesa të paarsyetuara dhe dëmtojnë buxhetin e ministrisë”, thuhet në raporti e publikuar.
Rekomandimi i auditorit dhe përgjigjja e ministrisë
ZKA i ka dhënë Ministrisë rekomandimin që të analizojë situatën dhe të ndërmarrë hapa konkretë për zgjidhjen e saj, gjithmonë në përputhje me kornizën ligjore në fuqi. Rekomandohet që të shqyrtohen të gjitha mundësitë për ndalimin e pagesave të tilla dhe për të siguruar regjistrim të saktë të prezencës në punë.
Nga ana tjetër, menaxhmenti i entitetit është pajtuar me gjetjet, duke pranuar nevojën për masa konkrete.
