Policia e Kosovës ka realizuar me sukses një tjetër operacion në kuadër të zbatimit të urdhërarresteve gjyqësore, duke arrestuar një person të shpallur në kërkim për shmangie nga vuajtja e dënimit.
Burimet e Gazetës Sinjali bëjnë me dije se bëhet fjalë për Valmir Ademin, rreth 27-vjeçar, i cili është ndaluar në rrugën “Ukshin Kovaqica” në Mitrovicë gjatë një kontrolli të zhvilluar nga njësia reaguese e SP Mitrovicë Jugu.
Pas verifikimeve është konstatuar se Ademi kishte dy urdhërarreste aktive dhe një dënim me burg prej 4 muajsh, i cili nuk ishte ekzekutuar.
Menjëherë pas arrestimit, në bashkëpunim me njësinë policore të Vushtrrisë, ai është dërguar në Qendrën e Paraburgimit Hajvali për të vuajtur dënimin. Ky është një tjetër rast që dëshmon angazhimin e vazhdueshëm të Policisë në zbatimin e vendimeve gjyqësore dhe forcimin e sundimit të ligjit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
