Kryeministri në detyrë, Albin Kurti, ka hedhur gurthemelin për ndërtimin e dy urave mbi lumin Ibër, afër urës kryesore atje.
Kurti ishte i shoqëruar nga Nënkryetari i Mitrovicës së jugut, Arian Tahiri dhe kryetari i Mitrovicës së veriut, Erqen Atiq, si dhe nga disa deputetë e ministra në detyrë.
“Së shpejti në vjeshtë do ta inaugurojmë si përmbyllje të punimeve”, tha Kurti.
“Jemi shumë të gëzuar sepse përfitojnë të gjithë qytetarët”, tha ai.
Këtë, ai tha se e bëjnë për të treguar “përkushtimin tonë që ndërmjet veriut dhe jugut të ketë sa më shumë komunikim, qarkullim, bashkëpunim e shkëmbime”.
“Këto dy ura të cilat janë në të dyja anët e urës kryesore mbi Ibër, njëra prej tyre do të jetë edhe për automjete e këmbësorë, ndërkaq tjetra do të jetë vetëm për këmbësorë. Ajo që do të jetë për automjete dhe për këmbësorë është e gjatë 51 metra, është e gjerë 10 metra, me ç’rast nga 1.5 metër trotuar i ka në të dy anët. Ndërkaq kjo ku jemi tash këtu, do të jetë vetëm për këmbësorë, me gjatësi 41 metra, ndërkaq gjerësi 37 metra. Mbi lumin Ibër gjithsej janë 77 ura, në tri shtete: në Mal të Zi, në Republikë të Kosovës dhe në Serbi”, tha Kurti.
