Kryetari i Partisë Demokratike të Kosovës, Memli Krasniqi në takimin me Presidenten Vjosa Osmani – Sadriu ka rikonfirmuar gatishmërinë e PDK-së për të kontribuar në tejkalimin e bllokadës për konstituimin e Kuvendit.
Krasniqi, në një postim në Facebook ka thënë se shpreson këto konsultime të sjellin reflektim, tejkalim të kryeneçësisë politike dhe rikthim te rregullorja, ligji dhe Kushtetuta. Kosova.
“Si PDK, kemi paraqitur qëndrime të qarta dhe propozime konkrete për të rikthyer funksionalitetin institucional dhe respektin ndaj rendit demokratik. Bashkëpunimi dhe kompromisi mbeten parimet tona udhërrëfyese – të konfirmuara qartë edhe në aktgjykimin e fundit të Gjykatës Kushtetuese”, ka shkruar lideri i PDK-së.
PDK konsideron se Kosova ka nevojë urgjente për institucione funksionale, fuqiplota dhe legjitime.
“Nuk kemi pse të presim afatin kushtetues 30-ditor për konstituimin e Kuvendit – mund dhe duhet ta bëjmë qysh nesër, në mënyrën e duhur. Ndryshe – Kushtetuesja do të jetë përsëri adresa për të konfirmuar pengmarrjen institucionale të shtetit!”, është shprehur Krasniqi.
