Deputetja e LDK-së, Hykmete Bajrami, ka reaguar ashpër ndaj veprimeve të Lëvizjes Vetëvendosje, duke e akuzuar atë për përpjekje që sipas saj po e rrezikojnë rendin kushtetues në vend.
Sipas Bajramit, vetëm gjatë gjashtë seancave të fundit, ministrja në detyrë e Drejtësisë, Albulena Haxhiu, nuk ka arritur të sigurojë votat e nevojshme për t’u zgjedhur kryetare e Kuvendit. Po ashtu, ajo deklaroi se VV-ja ka dështuar në 34 tentativa për të formuar komisionin për votim të fshehtë – një proces që, siç kujton Bajrami, është në kundërshtim me frymën e vendimit të Gjykatës Kushtetuese.
“Gjykata Kushtetuese ka sqaruar qartë se deputetët janë të lirë të votojnë sipas vullnetit të tyre e jo sipas direktivave të Albin Kurtit,” deklaroi Bajrami, duke shtuar se përpjekjet e VV-së për ta shtyrë përpara procesin përmes përsëritjes së votimeve po rezultojnë të kota.
Ajo paralajmëroi se me këtë qasje, LVV po e çon vendin drejt një përmbysjeje të rendit kushtetues dhe se pasojat do të jenë të rënda për të gjithë.
“Për këtë situatë, përgjegjësia bie plotësisht mbi LVV-në,” shkroi ajo në Facebook.
Postimi i plotë:
LVV po e çon vendin drejt përmbysjes së rendit kushtetues
Në gjashtë seanca të hapura, Albulena Haxhiu ka dështuar të sigurojë votat e nevojshme për t’u zgjedhur kryetare e Kuvendit. Po ashtu, Lëvizja Vetëvendosje ka dështuar në 34 tentativa për të formuar komisionin për votim të fshehtë.
Gjykata Kushtetuese ka sqaruar qartë se deputetët janë të lirë të votojnë sipas vullnetit të tyre e jo sipas direktivave të Albin Kurtit. Me 34 votime të dështuara, deputetët e kanë treguar hapur se janë kundër formimit të komisionit për votim të fshehtë, rrjedhimisht, kundër zgjedhjes së Albulena Haxhiut si kryetare e Kuvendit.
Vetëvendosje mund ta përsërisë këtë skenar edhe dhjetë herë të tjera, por pyetja është: Çfarë arrihet me këto përpjekje të dështuara?
E gjithë kjo qasje po e çon vendin drejt përmbysjes së rendit kushtetues, dhe kur kjo të ndodhë, pasojat do të jenë shumë më të rënda për të gjithë. Për këtë situatë, përgjegjësia bie plotësisht mbi LVV-në.
