Njohësi i çështjeve politike, Agon Maliqi, ka thënë se mediat dhe OJQ-të kryejnë punë me interes publik, dhe se të njëjtat kanë nevojë për mekanizma financimi prej taksave tona. Ao ka shtuar se pa mediat e OJQ-të s’do të kishte festivale kulturore apo raportime mbi abuzimet me pushtetin.
I njëjti ka theksuar se praktika e pushteteve ka qenë që mbështetja ndaj mediave dhe OJQ-ve të jetë arbitrare dhe të përdoret si mekanizëm për blerje të heshtjes apo për kthimin e tyre në instrumente politike.
‘‘OJQ-të dhe mediat kryejnë punë me interes publik. Pa to nuk do t’i kishim psh. gjithë këto festivale kulturore apo raportime mbi abuzimet me pushtetin. Për këtë arsye OJQ-të dhe mediat kanë nevojë për mekanizma financimi prej taksave tona, sidomos tani që mbështetja nga jashtë ka rënë. Por praktika e pushteteve ka qenë që mbështetja të jetë arbitrare dhe të përdoret si mekanizëm për blerje të heshtjes apo për kthimin e mediave dhe OJQ-ve në instrumente politike. Për këtë arsye duhet të gjindet një mënyrë e shkëputjes së kontrollit qeveritar (niveli qëndror apo komunal) mbi financimin publik të veprimtarisë së OJQ-ve dhe mediave. Një mënyrë mund të jetë duke ia bartur këtë përgjegjësi drejtpërdrejtë Kuvendit përmes krijimit të një Fondi të Interesit Publik, me mbikëqyrje nga të gjitha partitë parlamentare por edhe me figura jashtë politikës (votim i bordit me 2/3 të Kuvendit) si dhe me buxhet të vetin. Qeveritë dhe komunat mund të dizajnojnë politika ku shohin rol për OJQ-të dhe të ndajnë buxhet, por jo edhe t’i përzgjedhin ato – këtë punë mund dhe duhet ta bëjë vetëm një mekanizëm i pavarur prej pushteteve ekzekutive’’, ka shkruar ai.
