Ajatollah Ali Khamenei, Lideri Suprem i Iranit, ka lëshuar akuza të forta drejt Shteteve të Bashkuara, duke i cilësuar si hipokrite në pretendimet për mbrojtjen e të drejtave të njeriut.
Përmes një postimi në X, Khamenei i është referuar masakrës së Srebrenicës si shembull i asaj që ai e quan “gënjeshtra perëndimore”.
“Kushdo që dëshiron të shohë me sytë e tij gënjeshtrat e pretendimeve të Shteteve të Bashkuara dhe disa vendeve të tjera për mbështetjen e të drejtave të njeriut, duhet të shikojë ngjarjet në Srebrenicë. 12 korrik 1995,” ka shkruar Khamenei.
Komenti i tij vjen në Ditën Ndërkombëtare të Reflektimit dhe Përkujtimit të Gjenocidit të Srebrenicës, e shpallur nga Kombet e Bashkuara në vitin 2024.
Kujtojmë se, Masakra e Srebrenicës, e njohur ndërkombëtarisht si akt gjenocidi, ndodhi në korrik të vitit 1995, kur mbi 8,000 burra dhe djem myslimanë boshnjakë u vranë nga forcat serbe të Bosnjës gjatë Luftës së Bosnjës. Ngjarja ndodhi në një zonë që ishte shpallur “zonë e sigurt” nga OKB-ja dhe ishte e mbrojtur nga një kontigjent holandez prej 370 trupash paqeruajtëse, të cilët dështuan ta parandalonin masakrën.
Edhe pse më pas, SHBA dhe NATO reaguan me sulme ajrore për të frenuar më tej përshkallëzimin e konfliktit, raporti i Human Rights Watch i vitit 1999 kritikoi vonesat dhe dështimet e forcave ndërkombëtare, duke vënë në pikëpyetje efektivitetin e mbrojtjes humanitare perëndimore.
Megjithatë, përkundër akuzave të Khameneit, dihet se vetë regjimi iranian është nën kritika të ashpra për shkelje të të drejtave të njeriut, me Amnesty International që raportoi mbi 500 ekzekutime në Iran vetëm gjatë vitit 2023.
