Kosova po përballet me një ngërç të thellë politik që ka bllokuar funksionimin e Kuvendit dhe po e shtyn vendin drejt një krize serioze buxhetore. Sipas një raporti të KosovaPress, mungesa e rishikimit të buxhetit për vitin 2025 rrezikon të lërë projekte pa financim dhe mund të çojë në dështimin e përgatitjes për buxhetin e vitit 2026, nëse nuk zgjidhet shpejt situata politike.
Koalicioni LVV-Guxo-Alternativa fajëson partitë opozitare për qasjen bllokuese, duke theksuar se vendi po pëson humbje ekonomike. Në të njëjtën kohë, projektet infrastrukturore, subvencionet, investimet kapitale dhe pagesat për sektorin publik rrezikojnë të vonohen ose të ndërpriten – me ndikim të drejtpërdrejtë në jetën e qytetarëve.
Në raport thuhet se tri komuna, Prishtina, Gjilani dhe Zveçani, ende nuk kanë miratuar buxhetet lokale, çka po e bën të pamundur edhe rishikimin në nivel qendror. Agjencitë buxhetore ndërkohë kanë ngecur përballë kërkesave të reja që kërkojnë miratim formal.
Deputetja Mimoza Kusari-Lila nga LVV-ja tha se Ministria e Financave është në proces të trajtimit të kërkesave buxhetore, por pa rishikim nuk mund të alokohen fonde të reja. Deputeti i PDK-së, Ferat Shala, paralajmëroi për humbje kohe kritike në miratimin e projekteve, ndërsa eksperti i ekonomisë, Lekë Musa, theksoi se vonesat po dëmtojnë rëndë ekonominë dhe sektorin privat.
Kuvendi i Kosovës miratoi në nëntor 2024 një projektbuxhet prej 3.6 miliardë euro për vitin 2025, por aktualisht Qeveria është në detyrë dhe procesi i rishikimit mbetet pezull. Përpjekja e 45-të për konstituimin e legjislaturës së re dështoi sërish të premten.
