Një grup prej 59 deputetësh nga Partia Laburiste i kanë bërë thirrje Sekretarit britanik të Shtetit, David Lammy, dhe Ministrisë së Jashtme që ta njohin menjëherë Palestinën si shtet sovran.
Në një letër të dërguar këtë javë, deputetët e krahut të majtë dhe qendrës, përfshirë disa kryetarë komisionesh, theksojnë se “duke mos e njohur [Palestinën] si shtet, ne minojmë politikën tonë të një zgjidhjeje me dy shtete dhe vendosim një pritje që status quo-ja të mund të vazhdojë dhe të shohë fshirjen dhe aneksimin efektiv të territorit palestinez”.
Deputetët propozojnë gjithashtu pesë masa për të parandaluar qeverinë izraelite nga zbatimi i planit të saj për Rafah. Ata kanë shprehur shqetësimin se Gaza po “pastrohet etnikisht”, një pretendim ky që Izraeli e mohon fuqishëm.
Letra është organizuar nga Miqtë e Partisë Laburiste të Palestinës dhe grupi i Lindjes së Mesme dhe përshkruan planin izraelit si një përpjekje për “transferimin e popullsisë në skajin jugor të Gazës në përgatitje për deportim jashtë rripit”. Deputetët e cilësojnë këtë si “spastrimin etnik të Gazës”.
Zyrtarët izraelitë thonë se synojnë ndarjen e popullsisë civile nga grupi militant Hamas, i cili kontrollon pjesë të Gazës dhe ka pengje të rrëmbyera që nga sulmi i 7 tetorit, ngjarje që shënoi nisjen e luftës 21 muaj më parë.
Po të enjten, presidenti francez Emmanuel Macron tha në një konferencë për shtyp me Sir Keir Starmer se “të punojmë së bashku për të njohur shtetin e Palestinës dhe për të filluar këtë momentum politik është e vetmja rrugë drejt paqes”.
Ndërkohë, Franca nuk e ka njohur ende Palestinën si shtet, por Norvegjia, Irlanda dhe Spanja kanë bërë këtë hap vitin e kaluar.
