Një kalim i Armando Brojës në kampionatin gjerman nuk do të ishte surprizë, pasi futbollisti shqiptar preferohet së tepërmi atje.
Më herët është raportuar për interes nga Borussia Dortmund, ndërsa aktualisht janë dy skuadra të tjera që kanë shfaqur interes për të.
Sipas raportimeve në media, Leipzig dhe Stuttgart dëshirojnë ta afrojnë në skuadër sulmuesin e Kombëtares shqiptare, i cili aktualisht nuk është në planet e Chelsea-t dhe trajnerit Enzo Maresca për sezonin e ri.
Leipzig është shumë pranë shitjes së sulmuesit Benjamin Sesko, dhe në rast se kjo ndodh, Broja shihet si zëvendësuesi i tij.
Edhe Stuttgart po shqyrton afrimin e tij, pasi pritet që të largohet Nick Woltemade, për të cilin ka interes nga Bayern Munich, edhe pse oferta është refuzuar deri më tani, njofton euronewsalbania.
Të dyja klubet, në rast shitjeje të sulmuesve aktualë, do të përfitonin të ardhura të konsiderueshme dhe nuk do ta kishin problem të blinin kartonin e Brojës, që vlerësohet rreth 15 milionë euro.
Armando Broja vijon të jetë me pushime, ndërsa përfaqësuesit e tij kanë zhvilluar kontakte me disa klube të interesuara për shërbimet e tij.
Ndër mundësitë është përfolur edhe për bisedime me Ajax-in, por deri tani nuk ka asgjë zyrtare.
