Një person për pak ka përfunduar me fatalitet në pishinën Aqua Park në Mitrovicë, pasi është mbytur në ujë në një vend ku çmimi i hyrjes është tepër i lartë por me siguri të ulët.
Veriu.info mëson se bëhet fjalë për një person në moshë të re, rreth 20 vjeç, i cili është dërguar në emergjencën e Spitalit të Mitrovicës, të cilët pas intervenimit kanë rikthyer në jetë personin në fjalë.
Rastin për Veriu.info e ka konfirmuar shefi i emergjencës së Spitalit të Mitrovicës, Agron Sumiqi, i cili ka thënë se pasi personi u dërgua në emergjencë janë marrë masat e reanimacionit dhe është intubuar duke ia kthyer parametrat vital.
Pas kësaj i njëjti është dërguar në QKUK.
Stafi i emergjencës nën drejtimin e Agron Sumiqit si në shumë raste tjera tregohet efikas në intervenim profesional duke shpëtuar jetë.
Mbytja është një gjendje patologjike ku bllokohen rrugët e frymëmarrjes nga uji, dhe në këtë gjendje është esenciale dhënia e ndihmës së parë pasi personi mund të vdes.
